لاہور:قومی ٹیم کے سابق کپتان و سابق فاسٹ بالر وقار یونس کا پی سی بی میں ایڈوائزر کے طور پر تقرر عدالت میں چیلنج کردیا گیا ہے۔
شہری مشکور حسین کی جانب سے وکیل ندیم سرور کے توسط سے لاہور ہائی کورٹ میں دائر درخواست میں وفاقی حکومت، پاکستان کرکٹ بورڈ اور وقار یونس کو فریق بنایا گیا ہے۔
عدالت عالیہ میں دائر کی گئی درخواست میں موقف اختیار کیا گیا ہے کہ وقار یونس کا بطور ایڈوائزر تقرر قانون کے خلاف ہے کیوں کہ وقار یونس کے تقرر کے لیے کسی اخبار میں اشتہار نہیں دیا گیا۔
درخواست میں استدعا کی کہ لاہور ہائیکورٹ وقار یونس کی بطور ایڈوائزر ٹو چیئرمین پی سی بی تقرری کالعدم قرار دے۔