کراچی ( بزنس رپورٹر )کریسنٹ اسٹیل اینڈ الائیڈ پروڈکٹس لمیٹڈ نے چائنا ہاربر انجینئرنگ کمپنی لمیٹڈ اور الفجر انٹرنیشنل کے جوائنٹ وینچر کے ساتھ کے فور منصوبے کے لیے کوٹڈ پائپوں کی اضافی مقدار فراہم کرنے کا معاہدہ کیا ہے۔اس ضمن میں لسٹڈ کمپنی نے بدھ کے روز پاکستان اسٹاک ایکسچینج کو ایک نوٹس میں اس پیش رفت سے آگاہ کیا۔ اسٹاک ایکس چینج کو بتایا گیا کہ کریسنٹ اسٹیل اینڈ الائیڈ پروڈکٹس لمیٹڈ نے اپنے موجودہ معاہدے میں چائنا ہاربر انجینئرنگ کمپنی لمیٹڈ (سی ایچ ای سی) – الفجر انٹرنیشنل (اے ایف آئی) جوائنٹ وینچر (جے وی) کے ساتھ کوٹڈ پائپوں کی اضافی مقدار (ہاٹ رولڈ کوائلز کلائنٹ کی طرف سے فراہم کیے جائیں گے) کی تیاری اور فراہمی پر اتفاق کیا ہے۔ اس نظر ثانی کے ذریعے گریٹر کراچی بلک واٹر سپلائی اسکیم کے فور منصوبے کے لیے 65 ہزار میٹر کوٹڈ اسٹیل لائن پائپوں کی اضافی مقدار فراہم کی جائے گی۔