خانیوال(اسپورٹس ڈیسک)پی سی بی کے زیراہتمام خانیوال کی تاریخ میں پہلی مرتبہ سینئر انٹر ڈسٹرکٹ ملتان ریجن کرکٹ کے دو تین روزہ میچز اسپورٹس اسٹیڈیم خانیوال میں منعقد ہورہے ہیں ۔ تفصیلات کے مطابق پہلا میچ خانیوال اور لودھراں کے درمیان جبکہ دوسرا میچ خانیوال اور ساہیوال کے درمیان کھیلا جائے گا۔ سینئر انٹر ڈسٹرکٹ ملتان ریجن میچز میں خانیوال ،لودھراں ،ملتان،ڈی جی خان، ساہیوال، وہاڑی اور اوکاڑہ کی ٹیمیں شامل ہیں ، ان میچز میں بی سی بی کے ایس او پیز کی سختی سے پابندی کی جارہی ہے ۔ خانیوال اور لودھراں کے مابین کھیلے جانے والے میچ کے مہمان خصوصی ڈپٹی کمشنر محمد علی بخاری نے کہا کہ یہ تاریخی لمحہ ہے کہ خانیوال میں ڈسٹرکٹ اسپورٹس اینڈ یوتھ افیئر ڈیپارٹمنٹ کی جانب سے کرکٹ گرائونڈ میں بہترین پچ تیار کی گئی ہے۔
