ملتان: پاکستان کے کپتان شان مسعود نے انگلینڈ کے خلاف پہلے ٹیسٹ کے افتتاحی دن میں قومی ٹیم کی قیادت کرتے ہوئے اہم سنچری بنائی ہے ۔
ٹاس جیت کر پہلے بیٹنگ کا فیصلہ کرنے کے بعد اوپنر صائم ایوب 4 رنز بنانے کے بعد گس ایٹکنسن کی گیند پر کیچ آؤٹ ہوگئے ۔ تاہم، شان مسعود اور عبداللہ شفیق کی 114 رنز کی شراکت نے قومی ٹیم کو لنچ تک 122-1 کے اسکور پر پہنچا دیا۔
یہ ٹیسٹ سریز تین میچوں پر مشتمل ہے اور پہلا ٹیسٹ ملتان کرکٹ اسٹیڈیم میں کھیلا جا رہا ہے اور یہ آئی سی سی ورلڈ ٹیسٹ چیمپئن شپ 2023-25 کا حصہ ہے۔
آج کے میچ کے دوران، شان مسعود کو برائیڈن کارس کی گیند پر ایل بی ڈبلیو دیا گیا، تاہم بیٹر نے فیصلہ ریویو کیا اور ری پلے سے تصدیق ہونے کے بعد کہ گیند لیگ اسٹمپ کے باہر پِچ ہوئی تھی، فیصلہ واپس لے لیا گیا۔
اس وقت اسکور 189-1 ہے اور مسعود (109*) اور عبداللہ شفیق (72*) کریز پر موجود ہیں ۔
شفیق کو 35 کے اسکور پر ریلیف ملا جب انہوں نے ایک خطرناک سنگل کی کوشش کی اور انگلینڈ کے عبوری کپتان اولی پوپ کا براہِ راست تھرو بمشکل اسٹمپس کو چُھو سکا۔
یہ بات قابل ذکر ہے کہ انگلینڈ کی قیادت اولی پوپ کر رہے ہیں، کیونکہ مہمان ٹیم کے کپتان بین اسٹوکس کو ہیمسٹرنگ انجری کی وجہ سے ہنڈرڈ لیگ کے دوران اس مقابلے سے باہر کر دیا گیا تھا۔
اس کے علاوہ، جیمز اینڈرسن اس دورہ پاکستان میں ٹیم کے ہمراہ نہیں ہیں کیونکہ وہ اسکاٹ لینڈ کے الفریڈ ڈنہل لنکس چیمپئن شپ میں حصہ لے رہے ہیں۔
آخری بار جب انگلینڈ نے پاکستان میں ریڈ بال سیریز کھیلی تھی تو انہوں نے قومی ٹیم کو 3-0 سے شکست دی تھی، جو کہ 2022 میں ہوئی تھی۔
اس سے قبل مہمان ٹیم نے پاکستان میں 24 ٹیسٹ کھیلے تھے، جن میں سے صرف دو میں کامیابی حاصل کی تھی، جس کی وجہ سے 3-0 کی جیت اور زیادہ قابل ذکر ہو گئی۔
پلیئنگ الیون: پاکستان: شان مسعود (کپتان)، سعود شکیل (نائب کپتان)، صائم ایوب، عبداللہ شفیق، بابراعظم، محمد رضوان (وکٹ کیپر)، سلمان علی آغا، عامر جمال، شاہین آفریدی، نسیم شاہ، ابرار احمد شامل ہیں ۔
انگلینڈ: زیک کرالی، بین ڈکٹ، اولی پوپ (کپتان)، جو روٹ، ہیری بروک، جیمی اسمتھ، کرس ووکس، گس ایٹکنسن، برائیڈن کارس، جیک لیچ، شعیب بشیر شامل ہیں ۔