کراچی (اسپورٹس رپورٹر) عثمان پبلک اسکول سسٹم نے کراچی کے ایف بی ایریا میں راشد لطیف کرکٹ اکیڈمی گراؤنڈ میں عثمانین کرکٹ اکیڈمی کا افتتاح کردیا، جس کے ساتھ عثمانین پریمیئر لیگ (UPL) کا آغاز بھی ہوا۔ افتتاحی تقریب میں معروف کرکٹر اور اسکول کے سابق طالب علم میر حمزہ نے بطور مہمانِ خصوصی شرکت کی۔ جبکہ عثمان پبلک اسکول سسٹم کے ایگزیکٹو ڈائریکٹر سید معین الدین نیر ،چیئرمین شاہ کامرس انسٹیٹیوٹ ندیم شاہ،ڈائریکٹر اکیڈمکس، عثمان پبلک اسکول سسٹم عاصم علی یوسف، ڈائریکٹر، عثمان پبلک اسکول سسٹمانتظار احمد خان اور چیئرمین گلبرگ ٹی ایم سی نصرت اللہ بھی موجود تھے۔یہ لانچنگ عثمان پبلک اسکول سسٹم کے تمام کیمپسز میں نوجوان کرکٹ کے ٹیلنٹ کی تربیت اور فروغ کے ایک اہم سفر کا آغاز ہے۔پہلے دلچسپ میچ میں چیلنجرز اور فائٹرز کے مابین مقابلہ ہوا، جس میں فائٹرز نے شاندار کارکردگی دکھاتے ہوئے 6 وکٹوں سے کامیابی حاصل کی۔ ہنزہ اسف پراچہ نے بہترین کارکردگی کا مظاہرہ کیا اور مین آف دی میچ کا اعزاز حاصل کیا۔عثمانین پریمیئر لیگ (UPL) میں 14 ٹیمیں کراچی کے 3 مختلف گراؤنڈز میں 45 میچز کھیلیں گی۔ اس ٹورنامنٹ کا مقصد طلبہ میں ٹیم ورک، نظم و ضبط اور کھیل کے اصولوں کو فروغ دینا ہے اور نوجوان کرکٹرز کو اپنی صلاحیتوں کا مظاہرہ کرنے کا موقع فراہم کرنا ہے۔ایگزیکٹو ڈائریکٹر سید معین الدین نیر نے مہمان خصوصی میر حمزہ کا شکریہ ادا کیا اور اس عزم کا اعادہ کیا کہ ادارہ تعلیم کے ساتھ ساتھ کھیلوں اور کردار سازی کی سرگرمیوں کو فروغ دینے کے لیے کوشاں ہے۔ انہوں نے کہا، “ہمارا مقصد مستقبل کے ایسے رہنما تیار کرنا ہے جو نہ صرف تعلیمی میدان میں بلکہ کھیل اور اقدار میں بھی نمایاں ہوں۔عثمانین کرکٹ اکیڈمی اور UPL نوجوان کھلاڑیوں کے لیے تحریک کا ذریعہ بنیں گے اور عثمان پبلک اسکول سسٹم کی کمیونٹی میں کرکٹ کے فروغ میں معاون ثابت ہوں گے۔ اس دن کے جذبے اور جوش کو دیکھتے ہوئے، یہ اقدام جسمانی تعلیم اور ٹیم ورک کے فروغ کے لیے ادارے کی کوششوں میں قیمتی اضافہ ثابت ہوگا۔