نادرا کے سابق چیئرمین اور ورلڈ بینک کے موجودہ مشیر طارق ملک کو ڈیجیٹل شناخت اور پبلک انفرا اسٹرکچر کے شعبے میں دنیا کے 25 بہترین ماہرین میں شامل کر لیا گیا ہے۔
بین الاقوامی ادارے OKTA نے دنیا بھر سے ایسے 25 ماہرین کا انتخاب کیا ہے جنہوں نے ڈیجیٹل شناخت، سائبر سکیورٹی اور ڈیجیٹل ٹرسٹ کے شعبے میں نمایاں خدمات انجام دی ہیں۔ ان ماہرین کے نام اور تصاویر 4 مئی کو نیویارک کے ٹائمز اسکوائر کی اسکرین پر بھی پیش کیے جائیں گے۔
طارق ملک اس وقت ورلڈ بینک کے ٹیکنیکل ایڈوائزر کے طور پر خدمات انجام دے رہے ہیں، جبکہ اس سے قبل وہ اقوام متحدہ اور نادرا میں بھی اہم عہدوں پر کام کر چکے ہیں۔ وہ پاکستان میں بے نظیر انکم سپورٹ پروگرام کے ڈیجیٹل نظام کے بانیوں میں بھی شمار ہوتے ہیں۔
رپورٹ کے مطابق طارق ملک نے پاکستان میں نادرا کے ڈیجیٹل شناختی نظام کو جدید خطوط پر استوار کرنے میں کلیدی کردار ادا کیا، اور ان کی کاوشوں کو عالمی سطح پر بھی سراہا جا رہا ہے۔