کراچی کے بڑھتے ہوئے ٹریفک مسائل اور خستہ حال بنیادی ڈھانچے کو بہتر بنانے کے لیے سندھ حکومت نے بڑے پیمانے پر ترقیاتی منصوبوں کی منظوری دے دی ہے جبکہ شہر میں سڑکوں، ٹرانسپورٹ نظام اور ٹریفک کی روانی بہتر بنانے کے لیے 10 ارب روپے سے زائد فنڈز مختص کر دیے گئے ہیں۔
وزیراعلیٰ سندھ مراد علی شاہ کی زیرِ صدارت ہونے والے اہم اجلاس میں کراچی میگا ڈویلپمنٹ منصوبوں کا تفصیلی جائزہ لیا گیا۔ اجلاس کے دوران شہر میں جاری اور مجوزہ 10 بڑے ترقیاتی منصوبوں پر غور کیا گیا، جن کا مقصد شہری آمدورفت کو بہتر بنانا اور آبادی کے بڑھتے دباؤ سے نمٹنا ہے۔
وزیراعلیٰ ہاؤس کے ترجمان کے مطابق مراد علی شاہ نے حکام کو ہدایت کی کہ تمام ترقیاتی منصوبے مقررہ وقت کے اندر مکمل کیے جائیں تاکہ شہریوں کو جلد ریلیف فراہم کیا جا سکے۔ انہوں نے اس موقع پر واضح کیا کہ کراچی جیسے بڑے شہر کو جدید شہری منصوبہ بندی کی اشد ضرورت ہے۔
اجلاس میں میئر کراچی مرتضیٰ وہاب نے عظیم پورہ سے لانڈھی مرتضیٰ چورنگی تک متبادل کوریڈور منصوبے پر بریفنگ دیتے ہوئے بتایا کہ اس منصوبے پر 58 کروڑ 20 لاکھ روپے لاگت آئے گی۔ اس کوریڈور کی تعمیر سے ٹریفک کا دباؤ شاہراہِ بھٹو کی جانب منتقل ہوگا، جس سے رہائشی علاقوں میں ٹریفک کے مسائل میں نمایاں کمی آئے گی۔
وزیراعلیٰ سندھ نے منصوبے کو اہم قرار دیتے ہوئے وزیرِ بلدیات کو ہدایت جاری کی کہ اس منصوبے کو فوری طور پر منظوری کے لیے پیش کیا جائے تاکہ عملی کام کا آغاز جلد ممکن بنایا جا سکے۔
مراد علی شاہ کا کہنا تھا کہ کراچی کی مسلسل بڑھتی آبادی، گاڑیوں کی تعداد میں اضافے اور شہری دباؤ کے باعث مربوط اور دیرپا ترقیاتی حکمتِ عملی ناگزیر ہو چکی ہے۔
انہوں نے متعلقہ اداروں کو ہدایت کی کہ شہری سہولتوں کی بہتری کے لیے ترقیاتی منصوبوں پر تیزی سے عمل درآمد یقینی بنایا جائے تاکہ مستقبل میں ٹریفک اور انفرااسٹرکچر کے مسائل پر قابو پایا جا سکے۔
