نیویارک: اقوام متحدہ کی سلامتی کونسل United Nations Security Council نے پاکستان کی تیار کردہ سالانہ رپورٹ متفقہ طور پر منظور کر لی ہے، جسے سفارتی سطح پر پاکستان کی اہم کامیابی قرار دیا جا رہا ہے۔
اقوام متحدہ میں پاکستان کے سفیر Asim Iftikhar Ahmad نے بتایا کہ رپورٹ میں علاقائی بحرانوں، عالمی تنازعات اور موضوعاتی امور پر سلامتی کونسل کی کارروائیوں کو اجاگر کیا گیا ہے۔
انہوں نے کہا کہ رپورٹ میں عالمی امن و سلامتی کو درپیش خطرات، انسانی بحرانوں اور تنازعات کی صورتحال کی نشاندہی کی گئی ہے، جبکہ امن مشنز، تنازعات کے حل اور عالمی تعاون کی اہمیت پر بھی زور دیا گیا ہے۔
سفیر عاصم افتخار کے مطابق رپورٹ کی متفقہ منظوری اس بات کا اظہار ہے کہ عالمی برادری پاکستان کی سفارتی کاوشوں اور تعمیری کردار کو تسلیم کر رہی ہے۔
ماہرین کے مطابق سلامتی کونسل جیسے اہم عالمی فورم پر پاکستان کی تیار کردہ رپورٹ کی منظوری بین الاقوامی سطح پر پاکستان کے بڑھتے ہوئے سفارتی اعتماد کی عکاس ہے۔
