عیدالاضحیٰ کا دوسرا روز بھی آج ملک بھر میں جوش و خروش، محبت اور خوش ذائقہ پکوانوں کی خوشبو کے ساتھ گزر رہا ہے۔
سنتِ ابراہیمی کی ادائیگی کے بعد اب گھروں میں قربانی کے گوشت سے طرح طرح کے کھانے تیار ہو رہے ہیں اور عزیز و اقارب کو دعوتوں پر بلانے کا سلسلہ پورے جوبن پر ہے۔ ہر گھر میں ملنے ملانے کا جو ماحول ہے وہ عید کی اصل روح کو زندہ رکھے ہوئے ہے۔
دسترخوان پر اس بار بھی روایتی پکوانوں کی بہار ہے۔ صبح سویرے کلیجی کڑھائی سے دن کا آغاز کرنے والوں کی تعداد کم نہ تھی کیونکہ عید کے دن کلیجی کھانے کی اپنی ایک الگ ہی روایت اور لذت ہے۔
دوپہر کی دعوتوں میں مٹن پلاؤ اور بیف بریانی نے ہر دسترخوان کی رونق بڑھائی۔ کڑھائی کی خوشبو گلیوں تک پھیلتی رہی اور پڑوسیوں کو دعوت دیتی رہی۔ شام کے اوقات میں باربی کیو کا دور دورہ رہا جہاں ملائی بوٹی اور سیخ کباب نے سب کے منہ میں پانی لا دیا۔
نمکین پکوانوں کے بعد میٹھے کا دور بھی کچھ کم دلچسپ نہ رہا۔ گھروں میں تیار کردہ کھیر کی خوشبو فضا میں گھلی رہی جبکہ قلفی اور آئس کریم نے گرمی کے موسم میں میٹھے شائقین کو سکون پہنچایا۔
بچوں سے لے کر بزرگوں تک سب نے ان لذتوں سے بھرپور لطف اٹھایا۔
عید کا یہ ماحول گھروں میں گرمجوشی، ہنسی خوشی اور پیار و محبت کے احساس کو دوچند کر رہا ہے۔ یہی تہوار دراصل خاندانوں کو جوڑنے اور رشتوں کو تازہ کرنے کا بہترین موقع ہوتا ہے جسے ہر پاکستانی خاندان اپنے انداز میں مناتا ہے۔