کراچی میں عیدالاضحیٰ کے دوران صفائی ستھرائی کے انتظامات پر ایک بار پھر سیاسی سطح پر شدید ردعمل سامنے آیا ہے، جہاں ایم کیو ایم پاکستان نے شہر کی مجموعی صورتحال پر گہری تشویش اور سخت تحفظات کا اظہار کیا ہے۔
ایم کیو ایم پاکستان کے ترجمان کی جانب سے جاری بیان میں کہا گیا ہے کہ عید کے موقع پر صفائی ستھرائی کا پورا نظام شدید ناکامی سے دوچار نظر آیا، جس کے باعث شہری علاقوں میں آلائشوں کی بروقت تلفی ممکن نہ ہو سکی اور صورتحال بدترین انتظامی غفلت کی عکاسی کر رہی ہے۔
ترجمان کے مطابق شہر کی مرکزی شاہراہیں، داخلی و خارجی لنک روڈز اور مختلف گلی محلوں میں جانوروں کی باقیات بدستور موجود ہیں، جس کے باعث نہ صرف شدید تعفن پھیل رہا ہے بلکہ شہریوں کو آمدورفت اور روزمرہ زندگی میں بھی مشکلات کا سامنا ہے۔ متعلقہ بلدیاتی عملہ کئی علاقوں میں نظر نہیں آیا، جس سے صورتحال مزید بگڑ گئی۔
مزید کہا گیا ہے کہ سندھ سالڈ ویسٹ مینجمنٹ بورڈ اور ٹاؤن انتظامیہ شہریوں کو ریلیف فراہم کرنے میں مکمل طور پر ناکام ثابت ہوئی ہیں۔ ترجمان نے دعویٰ کیا کہ لانڈھی، کورنگی، ملیر، شاہ فیصل کالونی اور اولڈ سٹی ایریا میں صفائی کی صورتحال انتہائی ابتر رہی، جہاں جگہ جگہ آلائشیں موجود رہنے سے عوام کو شدید مشکلات درپیش آئیں۔
بیان میں مزید نشاندہی کی گئی کہ بلدیہ ٹاؤن، کیماڑی، اورنگی ٹاؤن، لیاقت آباد، فیڈرل بی ایریا، نارتھ ناظم آباد، نارتھ کراچی اور سرجانی ٹاؤن سمیت شہر کے بڑے حصوں میں بھی صفائی کا نظام مکمل طور پر مفلوج دکھائی دیا۔
ایم کیو ایم پاکستان کے ترجمان کے مطابق عید کے موقع پر شہریوں کو ریلیف فراہم کرنے کے تمام دعوے محض بیانات کی حد تک محدود رہے، جبکہ زمینی حقائق اس کے برعکس صورتحال پیش کر رہے ہیں، جس پر فوری توجہ دینے کی ضرورت ہے۔
