آزاد کشمیر کے ضلع حویلی میں ایک افسوسناک ٹریفک حادثے کے نتیجے میں جاں بحق افراد کی تعداد بڑھ کر 7 تک پہنچ گئی ہے، جب کہ ابتدائی طور پر اس واقعے میں 2 افراد کے جاں بحق اور 5 کے زخمی ہونے کی اطلاع دی گئی تھی۔
پولیس حکام کے مطابق حادثہ ضلع حویلی کے علاقے خورشید آباد میں پیش آیا، جہاں ایک رکشہ گہری کھائی میں جا گرا۔ حادثہ اس قدر شدید تھا کہ موقع پر ہی کئی افراد جان کی بازی ہار گئے، جبکہ زخمیوں کو فوری طور پر قریبی طبی مراکز منتقل کیا گیا تھا۔
بعد ازاں پولیس نے تصدیق کی کہ زخمیوں میں سے مزید 5 افراد زخموں کی تاب نہ لاتے ہوئے دم توڑ گئے، جس کے بعد مجموعی اموات کی تعداد 7 ہوگئی ہے۔ اس افسوسناک پیش رفت نے علاقے میں سوگ کی فضا طاری کردی ہے۔
واقعے کے بعد انتظامیہ اور ریسکیو ٹیموں نے امدادی کارروائیاں مکمل کرتے ہوئے جائے حادثہ کا جائزہ لیا اور زخمیوں کو فوری طبی امداد فراہم کی۔
ادھر وزیر اعظم آزاد کشمیر فیصل ممتاز راٹھور نے حادثے پر گہرے دکھ اور افسوس کا اظہار کرتے ہوئے ضلع حویلی میں ایک روزہ سوگ کا اعلان کیا ہے۔ انہوں نے حادثے کی مکمل رپورٹ بھی طلب کرلی ہے تاکہ واقعے کی وجوہات کا تعین کیا جاسکے۔
وزیر اعظم نے متعلقہ حکام کو ہدایت دی ہے کہ ٹریفک قوانین کی خلاف ورزی اور بغیر فٹنس سرٹیفکیٹ گاڑیوں کے خلاف سخت کارروائی عمل میں لائی جائے تاکہ مستقبل میں اس نوعیت کے حادثات سے بچا جاسکے۔
حکومتی ترجمان کے مطابق متاثرہ خاندانوں کے ساتھ مکمل یکجہتی کا اظہار کیا گیا ہے اور زخمیوں کو بہترین طبی سہولیات فراہم کرنے کی ہدایت جاری کردی گئی ہے۔
