شانگلہ: رحیم آباد کے علاقے کوزہ الپوری میں ایک گھر کی بوسیدہ چھت اچانک گرنے سے 6 بچے موقع پر ہی جاں بحق ہو گئے جبکہ ایک بچی کو زندہ نکال لیا گیا۔
نجی ٹی وی کے مطابق افسوس ناک حادثہ گزشتہ شب 2 بجے پیش آیا۔
ریسکیو 1122 کی ٹیمیں اطلاع ملتے ہی فوری طور پر جائے وقوع پر پہنچ گئیں اور امدادی آپریشن کا آغاز کیا۔ ریسکیو اہلکاروں نے اپنی پیشہ ورانہ مہارت کو بروئے کار لاتے ہوئے ملبے کے نیچے دبے بچوں کو نکالنے کے لیے بھرپور کوششیں شروع کر دیں جو کئی گھنٹے جاری رہیں۔
ڈسٹرکٹ ایمرجنسی آفیسر انجینئر ملک شیر دل خان کی زیر نگرانی ریسکیو ٹیموں نے تمام دستیاب وسائل استعمال کرتے ہوئے ملبہ ہٹایا۔ افسوسناک واقعے میں 6 بچوں نے موقع پر ہی دم توڑ دیا جبکہ ایک بچی کو معجزانہ طور پر زندہ حالت میں ملبے سے باہر نکال لیا گیا۔
ریسکیو حکام نے بتایا کہ زندہ بچ جانے والی بچی کو فوری طور پر طبی امداد فراہم کی گئی اور اس کی تشویشناک حالت کے پیش نظر اسے قریبی اسپتال منتقل کر دیا گیا ہے۔
بچی کو اسپتال میں ڈاکٹروں کی زیر نگرانی خصوصی طبی نگہداشت فراہم کی جا رہی ہے تاکہ وہ جلد صحت یاب ہو سکے۔
مقامی انتظامیہ اور امدادی اداروں نے واقعے کے بعد جائے وقوع کا تفصیلی جائزہ لیا تاکہ حادثے کی وجوہات کا تعین کیا جا سکے۔ ابتدائی اطلاعات کے مطابق مکان کی چھت کمزور تھی جس کے باعث یہ افسوسناک سانحہ پیش آیا۔ اہل علاقہ میں اس واقعے کے بعد شدید رنج و غم کی فضا پائی جاتی ہے۔
اس المناک حادثے کے بعد علاقے میں سوگ کی کیفیت ہے اور متاثرہ خاندان کے گھر تعزیت کرنے والوں کا تانتا بندھ گیا ہے۔
حکام نے عوامی مقامات اور رہائشی عمارتوں کی تعمیر کے معیار کو یقینی بنانے پر زور دیا ہے تاکہ مستقبل میں ایسے اندوہناک واقعات سے بچا جا سکے۔