پاکستان نے کراچی پورٹ ٹرسٹ کے ساحلی علاقے میں سمندری تجارتی مرکز کی تیاری کے امکانات کا جائزہ لینے کے لیے سعودی اور مقامی شراکت داروں کے ساتھ مفاہمت کی ایک یادداشت پر دستخط کئے ہیں۔
بحری امور کے وفاقی وزیر محمد جنید انوار چوہدری نے ایک بیان میں کہا کہ مفاہمتی یادداشت پر کراچی پورٹ ٹرسٹ، سعودی بزنس کونسل نجد گیٹ وے ہولڈنگ کمپنی، عارف حبیب ڈولمین ریئٹ مینجمنٹ لمیٹڈ اور پاکستان کارپوریٹ کنسورشیم نے دستخط کئے۔
مجوزہ منصوبہ کراچی میں ایم ٹی خان روڈ پر واقع کراچی پورٹ ٹرسٹ کی 140 ایکڑ اراضی پر تعمیر کیا جائے گا، جس کا مقصد اس علاقے کو ایک بڑے سمندری تجارتی مرکز میں تبدیل کرنا ہے۔