آج کراچی نہ پہنچ سکا تو کل پہنچوں گا، میرا وعدہ ہے کہ کراچی پہنچے بغیر سندھ نہیں چھوڑوں گا ، ٹنڈوجام ٹول پلازہ پر کارکنان سے خطاب
فائل فوٹو
حیدرآباد: وزیر اعلیٰ خیبر پختونخوا سہیل آفریدی نے کہا ہے کہ بلاول بھٹو زرداری مانیں میرے ساتھ جو ہو رہا ہے ان کی حکومت کر رہی ہے۔
سندھ کے علاقے ٹنڈوجام ٹول پلازہ پر کارکنان سے خطاب کرتے ہوئے سہیل آفریدی کا کہنا تھا کہ 27 ستمبر کو تاریخی مارچ ہوگا۔
انہوں نے کارکنان کا شکریہ ادا کرتے ہوئے کہا کہ وہ رکاوٹوں کے باوجود کراچی ضرور پہنچیں گے۔
وزیراعلیٰ خیبر پختونخوا نے بلاول بھٹو زرداری کو مخاطب کرتے ہوئے کہا کہ آپ مانیں میرے ساتھ یہاں جو کچھ ہو رہا ہے وہ آپ کی حکومت کر رہی ہے، اگر ایسا نہیں تو بتایا جائے کہ یہ سب کون کر رہا ہے۔
سہیل آفریدی کا کہنا تھا کہ سندھ میں مہمانوں کے استقبال کی روایت ہے، جو کچھ کیا جا رہا ہے وہ سندھ کی روایت نہیں۔
اُنہوں نے واضح کرتے ہوئے کہا کہ ایسا لگتا ہے کہ وہ نہیں چاہتے کہ میں کراچی پہنچوں، راستے میں جتنی بھی رکاوٹیں ڈالی جائیں، کراچی لازمی پہنچوں گا۔
وزیراعلیٰ خیبر پختونخوا کا کہنا تھا کہ اگر آج کراچی نہ پہنچ سکا تو کل پہنچوں گا، میرا وعدہ ہے کہ کراچی پہنچے بغیر سندھ نہیں چھوڑوں گا۔
