اسلام آباد (مانیٹرنگ ڈیسک) اسٹیج فنکاروں پر اداکاری کے دوران پولیس کی وردی پہننے پر پابندی عائد کردی گئی ہے۔ یہ پابندی پنجاب پولیس کی جانب سے جاری کردہ ایک مراسلے کے ذریعے عائد کی گئی ہے۔ پنجاب پولیس کے اے آئی جی آپریشنز کی جانب سے صوبے کے تمام آر پی اوز، سی پی اوز اور ڈی پی اوز کو ایک مراسلہ بھیجا گیا ہے۔ مراسلے میں کہا گیا ہے کہ اگر فنکاروں نے اسٹیج پر اداکاری کے دوران پولیس کی وردی کا استعمال کیا تو ان کے خلاف سخت ترین کارروائی کی جائے گی۔ مراسلے میں کہا گیا ہے کہ فحش اسٹیج ڈراموں میں پولیس کی وردی کا استعمال کیا جارہا ہے پنجاب پولیس کی جانب سے یہ اقدام سٹیزن پورٹل پر درج کرائی جانے والی شکایت پر اٹھایا گیا ہے۔
