تہران: سینئر ایرانی رکن پارلیمنٹ نے واضح کیا ہے کہ ایران کے پاس دشمن کے خلاف سالوں تک جنگ کیلیے میزائل اور ڈرون کے وسیع ذخائر موجود ہیں۔
ایرانی پارلیمنٹ کے کمیشن برائے قومی سلامتی اور خارجہ پالیسی کے نائب سربراہ علاؤ الدین بروجردی نےمیڈیاکو بتایا کہ ہم نے ابھی تک اپنی خفیہ صلاحیتیں ظاہر ہی نہیں کیں۔
علاؤ الدین بروجردی نے اعلان کیا کہ ایران کے میزائل اور ڈرون کے ذخائر اتنے وسیع ہیں کہ وہ برسوں کی جنگ کی ضروریات پوری کر سکتے ہیں۔
انہوں نے یہ انکشاف بھی کیا کہ تہران نے ابھی تک اپنی مکمل فوجی صلاحیتوں کا استعمال نہیں کیا ہے۔
علاؤ الدین بروجردی نے امریکی بحری ناکہ بندی کو غیر مؤثر قرار دیتے ہوئے مسترد کر دیا اور دعویٰ کیا کہ اس وقت تقریباً 120 بحری جہاز آبنائے ہرمز کے قریب گزرنے کے منتظر ہیں جبکہ بہت سے ایرانی جہاز امریکی مداخلت کے بغیر اپنی سرگرمیاں جاری رکھے ہوئے ہیں۔
