اسلام آباد: وفاقی وزیر خزانہ سینیٹر محمد اورنگزیب نے کہا ہے کہ خطے میں جاری کشیدگی پاکستان کے لیے ایک واضح تنبیہ کی حیثیت رکھتی ہے، جس کے تناظر میں توانائی کے متبادل ذرائع کی طرف فوری اور مؤثر منتقلی اب ناگزیر ہو چکی ہے۔
وفاقی دارالحکومت میں کیپیٹل مارکیٹ ڈویلپمنٹ فنڈ کی تقریب سے خطاب کرتے ہوئے انہوں نے کہا کہ پاکستان کی قیادت خطے میں بڑھتی ہوئی کشیدگی میں کمی اور استحکام کے لیے فعال کردار ادا کر رہی ہے، تاہم موجودہ حالات اس بات کا تقاضا کرتے ہیں کہ ملک ایک محتاط اور دور اندیش حکمت عملی اپنائے۔ توانائی کے شعبے میں روایتی ذرائع پر انحصار کم کر کے متبادل ذرائع کی طرف تیزی سے بڑھنا وقت کی اہم ضرورت ہے۔
وزیر خزانہ نے معاشی صورتحال پر گفتگو کرتے ہوئے کہا کہ کیپیٹل مارکیٹ ملکی معیشت کی ترقی میں بنیادی کردار ادا کر رہی ہے اور مشکل عالمی و داخلی حالات کے باوجود پاکستان کی معیشت درست سمت میں آگے بڑھ رہی ہے۔
انہوں نے کہا کہ اسٹاک مارکیٹ نے حالیہ عرصے میں استحکام کا مظاہرہ کیا ہے جبکہ معاشی اشاریوں میں بتدریج بہتری دیکھنے میں آ رہی ہے۔
انہوں نے مزید کہا کہ حکومت کی خصوصی توجہ کرنٹ اکاؤنٹ اور مالی خسارے جیسے بڑے معاشی چیلنجز پر مرکوز ہے۔ معاشی خود انحصاری ہی پائیدار استحکام کی واحد راہ ہے، جس کے لیے مقامی سرمایہ کاری کو فروغ دینا اور سرمایہ کاروں کو ملک کے اندر سرمایہ کاری پر آمادہ کرنا ناگزیر ہے۔
محمد اورنگزیب نے اس بات پر بھی زور دیا کہ قومی معیشت کے استحکام کے لیے داخلی وسائل پر انحصار بڑھانا ہوگا، تاکہ بیرونی دباؤ سے آزاد ایک مضبوط اور خود کفیل معاشی ڈھانچہ تشکیل دیا جا سکے۔
