امریکا کی میزبانی میں اسرائیل اور لبنان کے درمیان دو روزہ امن مذاکرات 14 اور 15 مئی کو منعقد ہوں گے جن کا مقصد خطے میں دیرپا امن اور استحکام قائم کرنا بتایا گیا ہے۔
امریکی محکمہ خارجہ کے مطابق ان مذاکرات میں ایک جامع امن معاہدے پر بات چیت کی جائے گی جس میں لبنان کی خودمختاری، سرحدی تعین اور سکیورٹی امور شامل ہوں گے، یہ مذاکرات خطے میں جاری کشیدگی کو کم کرنے اور مستقل امن کی طرف پیش رفت کے لیے اہم قدم ہیں۔
امریکی محکمہ خارجہ نے کہا ہے کہ مذاکرات کا ایک اہم مقصد لبنان میں ریاستی رٹ کی بحالی اور سکیورٹی نظام کو مضبوط بنانا ہے۔ اس کے ساتھ ساتھ یہ بھی کہا گیا ہے کہ خطے میں پائیدار امن کے لیے غیر ریاستی مسلح گروہوں کے کردار پر بھی غور کیا جائے گا۔
بیان میں یہ مؤقف بھی سامنے آیا ہے کہ حزب اللہ کو غیر مسلح کرنا امن کے لیے ضروری ہے، جبکہ لبنان میں ریاستی اداروں کی مکمل عملداری کو امن معاہدے کی بنیادی شرط قرار دیا گیا ہے۔
مذاکرات کے دوران لبنان کی تعمیر نو، انسانی امداد کے راستوں کی فراہمی اور جنگ سے متاثرہ علاقوں میں بحالی کے منصوبوں پر بھی غور کیا جائے گا،امریکا ان مذاکرات میں دونوں ممالک کے مفادات کے درمیان توازن قائم کرنے کے لیے کردار ادا کرے گا۔
ذرائع کے مطابق اسرائیل اور لبنان نے قومی مفاد کی بنیاد پر مذاکرات جاری رکھنے پر اتفاق کیا ہے، جسے کئی دہائیوں پر محیط تنازع کے خاتمے کی جانب ایک اہم پیش رفت قرار دیا جا رہا ہے۔
