اسلام آباد: وفاقی وزیر منصوبہ بندی احسن اقبال نے تجویز پیش کی ہے کہ آبادی پر قابو پانے والے صوبوں کو قومی مالیاتی ایوارڈ میں خصوصی مراعات دی جائیں۔
نجی ٹی وی کی رپورٹ کے مطابق انہوں نے کہا کہ ملکی وسائل کے بہترین استعمال اور پائیدار ترقی کے لیے آبادی کو متوازن رکھنا ضروری ہے۔
ایک تقریب سے خطاب کرتے ہوئے وفاقی وزیر نے خبردار کیا کہ اگر ملک میں آبادی کے اضافے کی موجودہ شرح اسی رفتار سے برقرار رہی تو سال 2050 تک پاکستان کی مجموعی آبادی 370 سے 400 ملین کے سنگ میل تک پہنچ سکتی ہے جو ایک بڑا چیلنج ہے۔
احسن اقبال نے مزید کہا کہ آبادی میں بے ہنگم اضافے سے صحت، تعلیم اور روزگار کے مواقع محدود ہونے کا خدشہ ہے۔ انہوں نے اس بات پر زور دیا کہ غذائی قلت اور پانی کی کمی جیسے مسائل سے بچنے کے لیے آبادی پر فوری کنٹرول لازمی ہے۔
وفاقی وزیر نے وضاحت کی کہ بڑھتی ہوئی آبادی ملک کی معاشی پیشرفت کی راہ میں سب سے بڑی رکاوٹ ہے۔ اگر بروقت درست فیصلے نہ کیے گئے تو مستقبل میں بنیادی انسانی سہولیات کی فراہمی ممکن نہیں رہے گی، جس سے ملکی معیشت پر شدید دباؤ پڑے گا۔
ان کا کہنا تھا کہ این ایف سی ایوارڈ میں آبادی کو کنٹرول کرنے والے صوبوں کے لیے خصوصی مراعات کا نظام لانا وقت کی اہم ضرورت ہے۔ اس اقدام سے صوبوں میں آبادی کے توازن کو برقرار رکھنے کا مقابلہ پیدا ہوگا اور قومی سطح پر بہتر نتائج حاصل ہوں گے۔
حکومتی سطح پر اس تجویز کو قومی وسائل کے منصفانہ اور موثر استعمال کے لیے ایک اہم قدم قرار دیا جا رہا ہے۔
ماہرین کا کہنا ہے کہ اگر صوبائی حکومتیں فعال کردار ادا کریں تو آبادی کے بڑھتے ہوئے سیلاب کو روک کر ملک کو بڑے معاشی بحران سے بچایا جا سکتا ہے۔
