امیر جماعت اسلامی سینیٹر سراج الحق کا کہنا ہے کہ پاکستانی عوام مہنگائی کا سونامی برداشت کر رہے ہیں جو ناقابل برداشت ہے، عید الاضحیٰ کے بعد حکومت کے خلاف عوامی تحریک کا آغاز کریں گے۔
لاہور میں منصورہ میں میڈیا سے گفتگو کرتے ہوئے امیر جماعت اسلامی نے کہا کہ کورونا وائرس کی وبا میں عوام نے حکومت کو بھی دیکھا لیکن جماعت اسلامی مسلسل جدوجہد کر رہی ہے۔
سراج الحق نے کہا کہ پیٹرولیم مصنوعات اور گیس کی قیمتوں میں اضافہ کر کے حکومت نے عید کی خوشیوں پر ڈاکہ ڈالا، جماعت اسلامی عید کے بعد حکومت کے خلاف عوامی تحریک شروع کرے گی، باطل نظریات اور نظام کا مقابلہ کرنے کے لیے عوام متحدہ ہو جائیں۔
انہوں نے کہا کہ قرآن و شریعت کا نظام ملک و قوم کے مسائل حل کرسکتا ہے، ملک میں امریکا کے غلام حکمران اسلامی پاکستان کی رہ میں سب سے بڑی رکاوٹ ہیں، ترقی و خوشحالی کے لیے معیشت کو سود سے پاک اور عدالتوں میں قرآن کا نظام لانا ہوگا۔
سینیٹر سراج الحق نے کہا کہ ترکی میں آیا صوفیہ مسجد کی بحالی اسلامی انقلاب کی جانب پیش قدمی ہے، کشمیر، فلسطین سمیت مقبوضہ مسلم علاقوں کی آزادی عالم اسلام کی ذمہ داری ہے۔
امیر جماعت اسلامی نے قوم کو عید الاضحیٰ کی مبارک باد دیتے ہوئے کہا کہ عید کے موقع پر مسکینوں، یتیموں اور مستحقین کو اپنی خوشیوں میں شامل کریں۔