جھل مگسی سے ارشاد لاشاری
بلوچستان کے ضلع جھل مگسی میں گزشتہ روز ہلکی سی بارش ہوتے ہی میونسپل کمیٹی کا پول کھل گیا۔ گنداواہ کے مختلف گلی محلوں میں بارش کے بعد نکاسی آب نہ ہونے کے باعث شہری شدید مشکلات کا شکار ہیں۔ نالیوں کی صفائی نہ ہونے اور گلی محلوں میں سیوریج لائنوں کی عدم تعمیر کے باعث شہریوں اور راہگیروں کو گزرنے میں شدید مشکلات درپیش ہیں۔
تفصیلات کے مطابق جھل مگسی شہر ہیڈکوارٹرمیں گزشتہ رات ہونے والی بارش نے میونسپل کمیٹی کے دعووں کی قلعی کھول دی، بارش کے بعد شہر کی سڑکیں تالاب کا منظر پیش کررہی ہیں۔
جگہ جگہ کیچڑ اور بارش کے جمع پانی سے راہگیروں کو گزرنے میں سخت مشکلات کا سامنا ہے شہر کے خارجی و داخلی راستوں ،مرکزی بازار ، سمیت مختلف مقامات پر سڑکوں اور گلیوں میں بارش کا پانی نکاسی آب نہ ہونے کے باعث جمع ہے جس سے تاجروں اور شہریوں کو سخت دشواری کا سامناہے۔ جگہ جگہ کچرے کے ڈھیروں کے باعث کیچڑ اور بارش کی پانی کھڑا ہونے سے ٹریفک کی روانی بھی بری طرح متاثر ہورہی ہے اور حادثات بھی رونماء ہو سکتے ہیں ۔ کیچڑ جمع ہونے سے جہاں پر تاجربرادی کو سخت مشکلات کا سامنا کرنا پڑرہا ہے وہی پر مسافروں اور شہریوں کو بھی سخت مشکلات کا سامنا ہے شہریوں اور تاجروں نے اعلی حکام سے مطالبہ کرتے ہوئے کہا کہ میونسپل کمیٹی کی غفلت اور کوتاہی کا فوری طور پر نوٹس لے کر عوام کو درپیش مسائل کے حل کو یقینی بنایا جائے۔