اوجھا انسٹی ٹیوٹ آف چیسٹ ڈیزیز میں مریضوں کا مفت علاج

ڈاؤ یونیورسٹی آف ہیلتھ سائنسز کے وائس چانسلر پروفیسر محمد سعید قریشی نے اعلان کیا ہے کہ اوجھا انسٹی ٹیوٹ آف چیسٹ ڈیزیز میں میں امراض سینہ کے تمام مریضوں کو سی ٹی اسکین اور الٹرا ساؤنڈ کی سہولت مفت فراہم کی جائے گی جبکہ وارڈ میں دیگر طبی سہولتیں بھی بہتر بنائی گئی ہیں جنہیں مزید بہتر کیا جا رہا ہے، یہ باتیں انہوں نے اوجھا انسٹی ٹیوٹ آف چیسٹ ڈیزیز میں وارڈ کی تزئین نو (رینوویشن) سی ٹی اسکین مشین اور الٹراساؤنڈ کی سہولتوں کے رسمی افتتاح کے موقع پر بات کرتے ہوئے کہیں، اس موقع پر پرو وائس چانسلرز پروفیسر زرناز واحد، پروفیسر کردار دوانی، پروفیسر نصرت شاہ، او آئی سی ڈی کے ڈائریکٹر پروفیسر فیصل فیاض زبیری، ڈاؤ یونیورسٹی اسپتال کے میڈیکل سپرنٹنڈنٹ ڈاکٹر زاہد اعظم, ڈاؤ انسٹی ٹیوٹ آف ریڈیالوجی کی ڈائریکٹر نسرین ناز، ڈاکٹر نیاز سومرو، ڈاکٹر سیف اللہ بیگ ودیگر بھی موجود تھے۔ پروفیسر محمد سعید قریشی نے کہا کہ اوجھا انسٹیٹیوٹ طویل عرصے سے امراض سینہ کے مریضوں کو مفت علاج کی سہولت فراہم کر رہا ہے۔ ٹی بی کے مریضوں کے تمام ایکسرے اور لیبارٹری ٹیسٹ بھی مفت کیے جاتے ہیں جبکہ تمام امراض سینہ کے داخل مریضوں کو دوائیں اور تمام سہولت مفت فراہم کی جاتی ہیں۔ اس موقع پر ڈاؤ انسٹیٹیوٹ آف ریڈیالوجی کی ڈائریکٹر ڈاکٹر نسرین ناز نے کہا کہ امراض سینہ کے داخل مریضوں میں کسی پچیدگی کے متعلق جاننے کے لیے سی ٹی اسکین کی ضرورت تھی ۔ اس لیے یہ سہولت فراہم کر دی گئی ہے نہ صرف داخل مریضوں کا سی ٹی سکین مفت ہوگا بلکہ او پی ڈی میں جن مریضوں کے متعلق ٹی بی کا شبہ ہوگا اس کا بھی مفت اسکین کیا جائے گا۔ ڈائریکٹر او آئی سی ڈی فیصل فیاض زبیری نے کہا کہ داخل مریضوں کے لئے وارڈ کی سہولیات کو بہتر کر دیا گیا ہے اور او آی سی ڈی میں مریضوں کے لیے سہولت میں بتدریج اضافہ کیا جارہا ہے جس سے او پی ڈی میں آنے والے سینکڑوں مریضوں کو فائدہ ہو گا ۔قبل ازیں پروفیسر محمد سعید قریشی نے وارڈ کی تزئین نو اور سی ٹی اسکین کی سہولت کاتختی کی نقاب کشائی اور ربن کاٹ کر رسمی افتتاح کیا جبکہ یاسمین ٹرسٹ کی سربراہ یاسمین سمیع نے الٹرا ساؤنڈ کی سہولت کا ربن کاٹ کر افتتاح کیا ۔