جامعہ مسجد امامیہ کے شہدا کی نماز جنازہ فضا سوگوار

قصہ خوانی بازار پشاور میں دہشت گردی کا نشانہ بننے والی کوچہ رسالدار کی جامع مسجد امامیہ میں شہید ہونے والے نمازیوں کی نماز جنازہ
ادا کرنے کا سلسلہ جاری ہے۔علاقے کی فضا سوگوار ہے۔ جگہ جگہ ختم القرآن کی محفل کا انعقاد کیا گیا ہے۔خودکش دھماکے میں شہید افراد کی تعداد 59 تک پہنچ گئی ہے۔ اس وقت خودکش حملے کے 191 زخمی افراد لیڈی ریڈنگ ہسپتال میں زیر علاج ہیں۔وزیر اعلیٰ خیبر پختونخوا محمود خان نے ایل آر ایچ پشاور میں قصہ خوانی بازار دھماکے میں زخمی افراد کی عیادت کی ۔وزیر اعلیٰ نے زخمیوں کو فراہم کی جانے والی طبی سہولیات پر اطمینان کا اظہار کیا۔انہوں نے دھماکے کے زخمیوں اور شہداء کے لواحقین کو ہر ممکن تعاون کی یقین دہانی کرائی۔ اس موقع پر محمود خان نےعوام کے تعاون سے دہشتگردی کو جڑ سے اکھاڑنے کے عزم کا اظہار کیا.قصہ خوانی دھماکے کے شہید دو پولیس اہلکاروں کی نماز جنازہ پولیس لائنز پشاور میں ادا کی گئی. وزیر اعلیٰ خیبر پختونخوا محمود خان نے جنازے میں شرکت کی.