صدر عارف علوی سے عیدپر مختلف شعبوں سے تعلق رکھنے والی شخصیات کی ملاقات

صدر مملکت ڈاکٹر عارف علوی سے عید الفطر کے موقع پر زندگی کے مختلف شعبوں سے تعلق رکھنے والی شخصیات نے منگل کو یہاں ایوان صدر میں عید ملن پروگرام میں ملاقات کی اور انہیں عید کی مبارکباد دی۔ سول سوسائٹی کے نمائندہ افراد، اراکین پارلیمنٹ، اسلام آباد میں مقیم غیر ملکی سفیروں، ایوان صدر کے عملہ اور ان کے اہل خانہ سمیت زندگی کے مختلف شعبوں سے تعلق رکھنے والے افراد نے بھی تقریب میں شرکت کی۔ خاتون اول بیگم ثمینہ عارف علوی بھی اس موقع پر صدر مملکت کے ہمراہ تھیں۔ صدر مملکت سے اس موقع پر دارالحکومت میں مقیم بیرونی سفارت کاروں نے ملاقات کی اور انہیں عیدالفطر کی مبارکباد دی۔ صدر مملکت نے مہمانوں کا پرتپاک استقبال کیا اور انہیں ایوان صدر میں خوش آمدید کہا۔ مختلف شعبہ ہائے زندگی سے تعلق رکھنے والے افراد نے بھی صدر سے عید ملن استقبالیہ پروگرام میں ملاقات کی۔ عید کے موقع پر آئے ہوئے مہمانوں نے ڈاکٹر عارف علوی کے ساتھ تصاویر بھی بنائیں، بعد ازاں مہمانوں کی ایوان صدر میں میٹھے اور دیگر کھانوں سے تواضع بھی کی گئی۔