قائداعظم یونیورسٹی کی جگہ تعمیر روکنے کا حکم

اسلام آباد ہائیکورٹ نے بہارہ کہو بائی پاس کی قائداعظم یونیورسٹی کی جگہ پر تعمیر روکنے کے حکم میں دو دسمبر تک توسیع کرسی ہے۔ ہائیکورٹ نے فریقین کو حتمی دلائل کی ہدایت دیتے ہوئے کہا کہ آئندہ سماعت پر کیس مکمل کر دیں گے۔
انوائرمنل پروٹیکشن ایجنسی نے بہارہ کہو منصوبے کی منظوری دے دی۔ انوائرمنٹل پروٹیکشن ایجنسی کی جانب سے عائد دس لاکھ روپے جرمانہ سی ڈے اے نے جمع کرا دیا۔ قائداعظم یونیورسٹی کے پروفیسرز کی درخواست پر جسٹس میاں گل حسن اورنگزیب نے سماعت کی۔
ایڈیشنل اٹارنی جنرل منور اقبال دُگل نے عدالت سے ایک ہفتے کی مہلت کی استدعا کی۔ عدالت نے ایڈیشنل اٹارنی جنرل کی استدعا منظور کرلی۔
درخواست گزار قائداعظم یونیورسٹی کے پروفیسر کی طرف سے وکیل کاشف ملک پیش ہوئے۔ ایڈیشنل اٹارنی جنرل نے کہا درخواست گزاروں کے خدشات اور تحفظات کابینہ میں بھیج دیے گئے۔ کابینہ سے اب تک رپورٹ موصول نہیں ہوئی، امید ہے آئندہ ہفتے تک آ جائے گی۔
عدالت نے پروفیسرز کے وکیل سے کہا کہ انہوں نے آپ کے خدشات سن لئے وہ دیکھیں گے۔ عدالت نے کیس کی سماعت 2 دسمبر تک ملتوی کردی۔