کراچی: بچوں کی اسمگلنگ اور دستاویزات میں ردوبدل کے مقدمے میں گرفتار ملزم صارم برنی کو کورٹ لاک اپ میں طبعیت خراب ہونے کے باعث اسپتال منتقل کردیا گیا۔ جبکہ ایف آئی اے نے عبوری چالان جمع کرادیا۔
ایڈیشنل ڈسٹرکٹ ایند سیشن جج شرقی کی عدالت کے روبرو دستاویزات میں ردوبدل اور بچوں کی اسمگلنگ کے مقدمے میں ملزم صارم برنی کی درخواست ضمانت پر سماعت ہوئی۔ متعلقہ جج کی عدم موجودگی کے باعث سماعت لنک جج کے روبرو ہوئی۔
وکلا صفائی نے ملزم صارم برنی کو لانڈھی سے سینٹرل جیل منتقل کرنے کی درخواست دائر کی، جسے عدالت نے منظور کرلیا۔
عدالت نے ملزم کی درخواست ضمانت کی سماعت وکلا صفائی کی استدعا پر 26 جون تک ملتوی کردی۔
وکیل صفائی عامر نواز وڑائچ نے بتایا کہ ملزم صارم برنی کی کورٹ لاک اپ میں طبعیت خراب ہونے کے باعث اسپتال منتقل کردیا گیا جبکہ ایف آئی اے نے مقدمے کا عبوری چالان جمع کرادیا ہے۔ ایف آئی اے کے مطابق ملزم پر بچوں کو لاوارث ظاہر کرکے امریکا اسمگل کرنے کا الزام ہے۔