اسلام آباد: وزیر خزانہ محمد اورنگزیب نے کہا ہے کہ مہنگائی کی شرح 38 سے کم ہو کر 12 فیصد پر آگئی ہے یعنی مہنگائی میں 26 فیصد کمی ہے۔
اسلام آباد میں میڈیا سے گفتگو کرتے ہوئے وزیر خزانہ محمد اورنگزیب کا کہنا ہے کہ ملک میں معاشی استحکام آرہا ہے کیونکہ حکومتی اقدامات سے معیشت میں نمایاں بہتری آئی ہے۔
انہوں نے مزید کہا کہ نئے مالی سال میں جانے سے پہلے ہم تمام بیک لاگ کو ختم کرنے کی کوشش کر رہے تھے۔
انہوں نے کہا کہ پاکستان کا زرمبادلہ 9 ارب ڈالر ہے اور عالمی بینک نے داسو منصوبے کے لیے ایک ارب ڈالر کی منظوری دی ہے، معاشی استحکام سے غیر ملکی اداروں کا اعتماد بحال ہوا ہے۔
وزیر خزانہ نے کہا کہ ایف بی آر 9300 ارب روپے کا ٹیکس ہدف حاصل کرے گا اور 3 سال میں ٹیکس ٹو جی ڈی پی کو 12 فیصد تک لے جایا جا رہا ہے۔
انہوں نے مزید کہا کہ توانائی اور پٹرولیم کے شعبوں میں اصلاحات کی جائیں گی اور معیشت کی بہتری پائیدار ہو گی۔ انہوں نے مزید کہا کہ ایف بی آر میں اصلاحات ضروری ہیں اور ٹیکس چوری کو روکنا ہوگا۔
وزیر خزانہ نے مزید کہا کہ چوری میں ایف بی آر حکام اور ٹیکس ادا کرنے والے دونوں ملوث ہیں۔ ٹیکس وصولی کا طریقہ کار آسان بنا دیا جائے تو آگے بڑھ سکتے ہیں۔ اورنگزیب نے کہا کہ میں آسان طریقہ کار تجویز کرنے پر ایف پی سی سی آئی کا شکر گزار ہوں۔
انہوں نے کہا کہ مفتاح اسماعیل نے کہا تھا کہ 2022 میں ریٹیلرز پر ٹیکس لگانا چاہیے تھا اور اسے شروع ہونا چاہیے تھا۔ 22,000 ریٹیلرز رجسٹرڈ تھے اور جولائی سے ان پر ٹیکس عائد ہونے جا رہا ہے۔ ایسا نہیں ہو سکتا کہ نان فائلز ٹیکس سکیم سے باہر رہیں۔ وزیر نے کہا کہ اگر میں نان فائلر ہوں تو مجھے یہ سوچنا چاہیے کہ مجھے ٹیکس جمع کرانا چاہیے۔