اسلام آباد: وفاقی حکومت نے بجلی کی قیمتوں میں 1 روپے 74 پیسے فی یونٹ اضافے کا اعلان کیا ہے جس کا اطلاق فوری طور پر ہوگا۔
حکومت کی طرف سے جاری کردہ نوٹیفکیشن کے مطابق یہ ایڈجسٹمنٹ بجلی کے تمام صارفین کے لیے لاگو کی گئی ہے ، اس فیصلے سے بجلی کے تمام صارفین پر 43.23 ارب روپے کا اضافی مالی بوجھ پڑے گا ۔ تمام ڈسٹری بیوشن کمپنیوں اور کے الیکٹرک صارفین پر بھی یہ ایڈجسٹمنٹ لاگو ہوگی ۔
اس سہ ماہی ایڈجسمنٹ کا اطلاق ستمبر، اکتوبر اور نومبر کے مہینوں کے لیے ہوگا۔ حکومت کی جانب سے کیے گئے اس فیصلے سے رییلیف کے منتظر عوام کو مزید اضافی بوجھ اٹھانا پڑے گا ۔
یاد رہے کہ نیشنل الیکٹرک پاور ریگولیٹری اتھارٹی (نیپرا) کی جانب سے چند روز قبل 1.75 روپے فی یونٹ کی سہ ماہی ایڈجسٹمنٹ کی منظوری دی گئی تھی اور اسے 6 ستمبر کو وفاقی حکومت کو بھیج دیا تھا۔ جس پر حکومت نے 1 روپے 74 پیسے فی یونٹ اضافے کو منظور کرتے ہوئے نوٹیفکیشن جاری کردیا ہے ۔