راولپنڈی: سیکورٹی فورسز نے 23 اور 24 اکتوبر کی درمیانی رات خیبرپختونخوا کے ضلع باجوڑ میں انٹیلی جنس کی بنیاد پر کیے گئے آپریشن (آئی بی او) کے دوران 9 دہشت گردوں، جن میں 2 خودکش بمبار اور ایک سرغنہ بھی شامل تھے، کو ہلاک کر دیا۔
انٹر سروسز پبلک ریلیشنز (آئی ایس پی آر) نے جمعرات کو جاری بیان میں بتایا کہ آپریشن کے دوران دہشت گردوں کے ہائی ویلیو ٹارگٹ اور سرغنہ سعید محمد المعروف “قریشی استاد” کو بھی سکیورٹی فورسز کے ساتھ شدید فائرنگ کے تبادلے کے بعد ہلاک کر دیا گیا۔
علاقے میں دہشت گردوں کے مکمل خاتمے کے لیے صفائی آپریشن جاری ہے، جبکہ فورسز نے دہشت گردوں سے بڑی مقدار میں اسلحہ، گولہ بارود اور دھماکہ خیز مواد بھی برآمد کیا ہے۔
فوج کے ترجمان کے مطابق، ہلاک ہونے والے دہشت گرد سکیورٹی فورسز اور معصوم شہریوں کے خلاف متعدد دہشت گردانہ کارروائیوں میں ملوث تھے۔
آئی ایس پی آر نے مزید کہا کہ سکیورٹی فورسز ملک سے دہشت گردی کی لعنت کو جڑ سے اکھاڑنے کے عزم پر قائم ہیں۔
گزشتہ ہفتے، بلوچستان کے ضلع پوشین میں ایک انٹیلی جنس آپریشن میں 5 دہشت گردوں کو گرفتار کیا گیا تھا، جبکہ صوبے کے ضلع ژوب میں ایک علیحدہ آپریشن میں 2 دہشت گردوں کو ہلاک کیا گیا تھا۔
یہ آپریشنز حکومت، سکیورٹی فورسز اور قانون نافذ کرنے والے اداروں کی جانب سے دہشت گردی کے بڑھتے ہوئے واقعات کے خلاف کی جانے والی مشترکہ کوششوں کا حصہ ہیں۔
سینٹر فار ریسرچ اینڈ سیکیورٹی اسٹڈیز (سی آر ایس ایس) کی جاری کردہ تیسری سہ ماہی (Q3) کی رپورٹ کے مطابق، اس سال کی پہلی تین سہ ماہیوں میں اموات کی کل تعداد 1,534 ہو چکی ہے، جو کہ 2023 کی مجموعی اموات 1,523 سے تجاوز کر گئی ہے۔
تیسری سہ ماہی کے دوران 328 واقعات میں 722 افراد ہلاک ہوئے جن میں شہری، سکیورٹی اہلکار اور مجرم شامل ہیں، جبکہ 615 افراد زخمی بھی ہوئے۔
بلوچستان اور خیبرپختونخوا ملک کی دہشت گردی کے خلاف جنگ میں سب سے آگے ہیں اور دہشت گردانہ حملوں کا سب سے زیادہ شکار ہیں۔