بھارت کے بیشتر بڑے شہروں میں بارش سے نپٹنے کے بہترین انتظامات ہوا کرتے تھے مگر اب یہ شہر بھی پاکستان سمیت جنوبی ایشیا کے بیشتر بڑے شہروں جیسے ہی ہوتے جارہے ہیں جہاں بارش انتظامیہ کو ذلیل کرنے پر تُل جاتی ہے۔
چند ماہ کے دوران بھارت میں موسلا دھار بارشوں نے مرکزی اور ریاستی حکومتوں کے ساتھ ساتھ مقامی اداروں کی کارکردگی کا بھی پول کھول کر رکھ دیا ہے۔
اب کے مون سون کی بارشوں نے بہت سے بھارتی شہروں میں مقامی اداروں کے انتظامات کا تمسخر اڑایا ہے۔ لاکھوں افراد کو شدید مشکلات کا سامنا رہا ہے۔ جنوبی ریاست کرناٹک کا دارالحکومت بنگلور بھارت میں انفارمیشن ٹیکنالوجی سیکٹر کا دارالحکومت تصور کیا جاتا ہے۔ اِسے انڈین سلیکون ویلی بھی کہتے ہیں۔ اس شہر کا یہ حال ہے چند ہفتوں کے دوران موسلا دھار بارشوں سے اس کے بیشتر علاقوں کا حال انتہائی بُرا ہوگیا ہے۔
پچھلی بارشوں کے شدید منفی اثرات ابھی ختم نہیں ہوئے تھے کہ بدھ کو ایک بار پھر موسلا دھار بارش نے بنگلور کو آلیا۔ بارش کا یہ اسپیل بھی اِتنا زوردار تھا کہ لاکھوں افراد مشکلات میں گِھرگئے۔ بہت سے مقامات پر پانی اتنا بھرگیا کہ لوگوں کے لیے گاڑیاں گزارنا دوبھر ہوگیا۔
بنگلور کے ایک بڑے فلائی اوور پر گزشتہ روز بارش کے باعث ایسا ٹریفک جام پیدا ہوا کہ لوگ کئی گھنٹے پھنسے رہنے کے بعد مجبور ہوکر اپنی گاڑیوں کو چھوڑ کر پیدل گھر چلے گئے۔ لوگوں کا کہنا تھا کہ شہری اداروں نے پچھلی بارشوں سے سبق سیکھتے ہوئے بارش سے نپٹنے کے معقول انتظامات نہیں کیے تھے۔