کراچی: وفاقی وزیر تجارت جام کمال نے سانحہ گل پلازہ کے متاثرین کو وفاقی حکومت کی جانب سے ہر ممکن تعاون کی یقین دہانی کراتے ہوئے کہا ہے کہ یہ ایک بڑا اور افسوسناک حادثہ ہے، جس میں قیمتی انسانی جانیں ضائع ہوئیں اور بھاری مالی نقصان بھی ہوا، وفاقی اور صوبائی حکومتیں مل کر متاثرین کی مدد اور نقصانات کے ازالے کے لیے بھرپور کوشش کریں گی۔
وفاقی وزیر تجارت جام کمال نے ڈپٹی میئر کراچی سلمان عبداللہ مراد کے ہمراہ گل پلازہ کا دورہ کیا، جہاں انہوں نے جائے حادثہ کا معائنہ کیا اور امدادی سرگرمیوں سے متعلق بریفنگ لی۔ اس موقع پر انہوں نے متاثرہ تاجروں اور عملے سے ملاقات بھی کی اور ان کے مسائل سنے۔ جام کمال نے کہا کہ حکومت اس سانحے کو محض ایک واقعہ سمجھ کر نظرانداز نہیں کرے گی بلکہ اس کے اسباب کا جائزہ لے کر مستقبل میں ایسے واقعات کی روک تھام کے لیے عملی اقدامات کیے جائیں گے۔
جام کمال نے گفتگو کرتے ہوئے کہا کہ گل پلازہ میں پیش آنے والا واقعہ گورننس کے نظام میں موجود خامیوں کی نشاندہی کرتا ہے، جنہیں دور کرنا ناگزیر ہے، سندھ حکومت اور میئر کراچی کے نوٹس میں تمام معاملات لائے جا چکے ہیں اور ان پر کام جاری ہے۔ وفاقی حکومت اس سلسلے میں ہر سطح پر مکمل تعاون فراہم کرے گی تاکہ شہریوں اور تاجر برادری کو محفوظ ماحول فراہم کیا جا سکے۔
وفاقی وزیر تجارت نے مزید کہا کہ ان کی بنیادی ذمے داری تاجر برادری سے متعلق امور دیکھنا ہے، اس لیے گل پلازہ سے متاثر ہونے والے تاجروں کی بحالی اور کاروباری نقصانات کے ازالے کے لیے وفاقی حکومت ہر ممکن مدد کرے گی، متاثرین کو تنہا نہیں چھوڑا جائے گا اور تمام متعلقہ اداروں کے ساتھ مل کر قابلِ عمل حل نکالا جائے گا۔
جام کمال کا کہنا تھا کہ اس سانحے سے سبق سیکھتے ہوئے ضروری ہے کہ عمارتوں کی حفاظت، فائر سیفٹی اور انتظامی نگرانی کے نظام کو مزید مؤثر بنایا جائے تاکہ آئندہ شہریوں اور تاجروں کو ایسے خطرناک واقعات کا سامنا نہ کرنا پڑے، وفاقی حکومت شہریوں کے جان و مال کے تحفظ کو اپنی اولین ترجیحات میں شامل رکھے گی۔
