میرپور:صدر آزاد جموں و کشمیر بیرسٹر سلطان محمود طویل علالت کے بعد انتقال کر گئے۔ وہ 71 سال کے تھے۔ ان کے انتقال کی خبر سے آزاد کشمیر، پاکستان اور کشمیری عوام میں گہرے رنج و غم کی لہر دوڑ گئی ہے، ان کے انتقال پر کشمیری عوام اور سیاسی حلقوں نے گہرے دکھ اور افسوس کا اظہار کیا ہے۔
خاندانی ذرائع کے مطابق بیرسٹر سلطان محمود اسلام آباد میں زیر علاج تھے۔ ان کی نماز جنازہ اتوار کو ان کے آبائی علاقے چیچیاں، میرپور میں سہ پہر 3 بجے ادا کی جائے گی۔
بیرسٹر سلطان محمود کشمیری عوام کے حق خودارادیت کی مضبوط اور مؤثر آواز سمجھے جاتے تھے۔ وہ 9 اگست 1955 کو چیچیاں، میرپور میں پیدا ہوئے۔
بیرسٹر سلطان محمود نے 1996 میں آزاد جموں و کشمیر کے وزیر اعظم کے طور پر خدمات انجام دیں، جبکہ 2021 میں وہ آزاد جموں و کشمیر کے صدر منتخب ہوئے۔ ان کی قیادت میں کشمیری عوام کے سیاسی حقوق اور سماجی مسائل کو فروغ دینے کی کوششیں جاری رہیں۔
