بین الاقوامی کریڈٹ ریٹنگ ایجنسی موڈیز نے پاکستان کے بینکنگ سیکٹر کے آؤٹ لک کو مثبت سے مستحکم قرار دے دیا ہے۔
موڈیز کی تازہ آؤٹ لک رپورٹ کے مطابق اگرچہ پاکستان کے معاشی حالات میں بتدریج بہتری آ رہی ہے، تاہم مجموعی معاشی بحالی کی رفتار اب بھی سست ہے اور متعدد چیلنجز بدستور موجود ہیں۔
رپورٹ میں کہا گیا ہے کہ آئندہ 12 سے 18 ماہ کے دوران پاکستان کے بینکوں کی کارکردگی مجموعی طور پر مستحکم رہنے کا امکان ہے، تاہم بلند شرح سود اور کریڈٹ رسک کا دباؤ بینکنگ سیکٹر کے لیے ایک بڑا چیلنج بنا رہے گا۔ موڈیز کے مطابق حکومتی مالی مشکلات اور محدود مالی گنجائش بھی بینکوں کے لیے خطرات میں اضافہ کر رہی ہیں۔
موڈیز نے نشاندہی کی کہ اگرچہ مالی نظم و ضبط میں بہتری کے کچھ آثار نظر آ رہے ہیں، لیکن بیرونی فنانسنگ کے مسائل اور مہنگائی سے متعلق خدشات تاحال برقرار ہیں۔ رپورٹ میں کہا گیا ہے کہ پالیسیوں پر عملدرآمد کے ممکنہ خطرات بھی بینکنگ سیکٹر کے مجموعی آؤٹ لک کو متاثر کر سکتے ہیں۔
عالمی کریڈٹ ایجنسی نے 2026 کے لیے پاکستان کی مجموعی قومی پیداوار کی شرح نمو 3.5 فیصد رہنے کا اندازہ لگایا ہے، جو حالیہ برسوں کے مقابلے میں قدرے بہتر تصور کی جا رہی ہے۔ تاہم موڈیز نے خبردار کیا ہے کہ معاشی استحکام کے لیے مسلسل اصلاحات، مالی نظم و ضبط اور بیرونی ادائیگیوں کے دباؤ کو کم کرنا ناگزیر ہوگا۔
رپورٹ کے مطابق پاکستان کے بینک مضبوط لیکویڈیٹی پوزیشن برقرار رکھے ہوئے ہیں، لیکن حکومتی قرضوں پر زیادہ انحصار اور معیشت میں سست رفتاری مستقبل میں خطرات پیدا کر سکتی ہے۔ موڈیز کا کہنا ہے کہ اگر اصلاحاتی عمل میں تسلسل برقرار رکھا گیا تو بینکنگ سیکٹر طویل مدت میں بہتر کارکردگی دکھا سکتا ہے۔
