کینیڈا نے مغربی کنارے پر قبضے سے متعلق اسرائیلی فیصلے کی شدید الفاظ میں مذمت کرتے ہوئے اسے بین الاقوامی قوانین کے منافی قرار دیا ہے۔
کینیڈین وزارت خارجہ کے جاری بیان میں کہا گیا کہ ایسے اقدامات نہ صرف خطے میں امن کے امکانات کو کمزور کرتے ہیں بلکہ مستقبل کی قابلِ عمل فلسطینی ریاست کے قیام کو بھی نقصان پہنچاتے ہیں۔
بیان میں اسرائیل سے مطالبہ کیا گیا کہ وہ مغربی کنارے سے متعلق اپنا فیصلہ فوری طور پر واپس لے اور آبادکاریوں میں توسیع بند کرے۔ کینیڈا نے اس امر پر زور دیا کہ یکطرفہ اقدامات مسئلے کے پرامن اور مذاکراتی حل کی راہ میں رکاوٹ بن سکتے ہیں۔
اس سے قبل امریکا اور برطانیہ بھی اسرائیلی فیصلے پر تشویش اور مخالفت کا اظہار کر چکے ہیں، جس سے ظاہر ہوتا ہے کہ عالمی سطح پر اس معاملے پر ردعمل شدت اختیار کر رہا ہے۔
دوسری جانب پاکستان سمیت آٹھ مسلم ممالک نے بھی مشترکہ بیان جاری کرتے ہوئے اسرائیلی اقدامات کی سخت مذمت کی ہے۔ بیان میں کہا گیا کہ مقبوضہ فلسطینی علاقوں پر اسرائیل کا کوئی حقِ خودمختاری نہیں اور یہ اقدامات مغربی کنارے کے غیر قانونی الحاق اور فلسطینی عوام کی بے دخلی کی کوششوں کو تیز کر رہے ہیں۔
