اسلام آباد: ملک بھر میں بجلی کی طلب اور رسد میں پیدا ہونے والا بڑا فرق بحران کی صورت اختیار کر گیا ہے جس کے نتیجے میں عوام کو طویل لوڈشیڈنگ کا سامنا ہے۔
نجی ٹی وی کے مطابق بجلی کا مجموعی شارٹ فال 4 ہزار 820 میگاواٹ تک جا پہنچا ہے جس نے نظام کو درہم برہم کر دیا ہے۔
ملک میں بجلی کی کل طلب 22 ہزار میگاواٹ تک پہنچ چکی ہے جبکہ تمام ذرائع سے پیداوار صرف 17 ہزار 180 میگاواٹ تک محدود ہے۔ حکام نے بتایا کہ طلب اور رسد کے اس توازن میں بگاڑ کے باعث ملک بھر میں اب تک 8 گھنٹے تک لوڈشیڈنگ کی جا رہی ہے۔
مختلف ذرائع سے بجلی کی پیداوار کے اعداد و شمار پر نظر ڈالیں تو پن بجلی کے منصوبوں سے 4 ہزار 500 میگاواٹ بجلی سسٹم میں شامل کی جا رہی ہے۔ تھرمل پاور پلانٹس اس وقت 7 ہزار 900 میگاواٹ بجلی پیدا کر رہے ہیں جو کہ مجموعی پیداوار کا ایک بڑا حصہ ہیں۔
ایٹمی بجلی گھروں سے 2 ہزار 880 میگاواٹ بجلی حاصل ہو رہی ہے جبکہ ونڈ پاور پلانٹس 1 ہزار 380 میگاواٹ بجلی فراہم کر رہے ہیں۔ اس کے علاوہ سولر پاور پلانٹس سے 420 میگاواٹ اور بیگاس سے 100 میگاواٹ بجلی کی پیداوار ریکارڈ کی گئی ہے جو مجموعی طلب پوری کرنے میں ناکام ہے۔
توانائی کے ماہرین کا کہنا ہے کہ موسم میں تبدیلی اور بجلی کی کھپت میں اضافے کے ساتھ ہی شارٹ فال کا تناسب بڑھ جاتا ہے۔ پیداواری صلاحیت میں خاطر خواہ اضافہ نہ ہونے کے باعث ملک کے بیشتر شہروں اور دیہی علاقوں میں بجلی کی فراہمی کا سلسلہ بری طرح متاثر ہو رہا ہے۔
بجلی کے اس جاری بحران کی وجہ سے صنعتی شعبے کو بھی مشکلات کا سامنا ہے جبکہ گھریلو صارفین طویل دورانیے کی غیر اعلانیہ لوڈشیڈنگ سے نالاں ہیں۔