ایوب خان کی لاش کو قبر سے نکال کر پھانسی دی جائے، خواجہ آصف

اسلام آباد: وزیر دفاع خواجہ آصف نے کہا ہے کہ اپوزیشن لیڈر کی جانب سے آرٹیکل 6 کے مطالبے کی حمایت کرتا ہوں ، آئین کی خلاف ورزی سب سے پہلے ایوب خان نے کی تھی، ایوب خان کو قبر سے نکال کر بھی آرٹیکل 6 لگانا چاہیے اور اس کی لاش کو نکال کر پھانسی دینا چاہیے۔

خواجہ آصف کا کہنا تھا کہ ہم تو مانتے ہیں کہ ضیا الحق کیساتھ تھے اور فلورپر معافی مانگ چکے ہیں، جس جس نے بھی آئین توڑا ہے اس پر آرٹیکل 6 لگنا چاہئیے، فرنٹ پر وہ لوگ ہیں جو مشرف کی مجلس شوری کا حصہ تھے۔ ان خیالات کااظہار انہو ں نے پیر کے روز قومی اسمبلی اجلاس میں اظہار خیال کرتے ہوئے کیا۔

ان کا کہنا تھا کہ اپوزیشن لیڈر عمر ایوب نے آرٹیکل چھ کا بڑا ذکر کیا، پی ٹی آئی کی کابینہ نے میرے خلاف آرٹیکل چھ لگانے کا فیصلہ کیا۔ میں آئین کی خلاف ورزی کرنے والوں پر آرٹیکل چھ لگانے کی حمایت کرنا ہوں، ایوب خان کو قبر سے نکال کر آرٹیکل لگانا چاہیے اور اس کا آغاز جعلی فیلڈ مارشل سے ہونا چاہیے۔

خواجہ آصف نے کہا کہ عدم اعتماد کے وقت آئین کو ختم کیا گیا پھر اس پر آرٹیکل چھ لگانا چاہیے۔وزیر دفاع کا کہنا تھا کہ حلف کی بات کی گئی تو سب سے پہلے اس کی خلاف ورزی ایوب خان نے کی اور جمہوری حکومت کا تختہ الٹا، شاخسانے اور افراتفری کی جڑ ایوب خان ہے، اس لیے آج آرٹیکل 6 لگائیں اور لاش کو قبر سے نکال کر پھانسی چڑھائیں۔

وزیر دفاع کا کہنا تھا کہ ابھی تو ابتدا ہوئی ہے ،ابھی تو پوری رات باقی ہے، آغاز پر ہی اپوزیشن کو مرچیں لگ رہی ہیں، ابوب خان نے قرآن اور سبز ہلالی پرچم پر حلف لی اور خلاف ورزیاں کیں اور ملک میں پہلا مارشل لاء لگایا۔وزیر دفاع نے کہا کہ ہم نے ڈکٹیٹر کا ساتھ دینے پر معافی مانگی ہے، شروع وہاں سے ہونا چاہیے جس رات عدم اعتماد روکنے کے لیے اسمبلی ختم کی گئی۔

خواجہ آصف کی تقریر کے دوران اپوزیشن جماعت سنی اتحاد کونسل کے اراکین اپنی نشستوں پر کھڑے ہوگئے اور شدید احتجاج اور نعرے بازی کی جب کہ اسپیکر قومی اسمبلی ایاز صادق نے انہیں خاموش رہنے کی تاکید کر تے رہے۔