نیویارک: یوکرین کے صدر ولادیمیر زیلنسکی نے امریکی خصوصی ایلچی برائے یوکرین کیتھ کیلاگ کو مشرقی ڈونیٹسک ریجن میں جاری جوابی کارروائی اور محاذِ جنگ کی تازہ صورتحال پر بریفنگ دی ہے۔
عالمی میڈیا رپورٹس کےمطابق زیلنسکی نے کہا کہ انہوں نے کیلاگ کو ڈوبروپیلیا اور پوکرووسک کے قریب یوکرینی افواج کی جوابی کارروائی کے نتائج اور محاذ پر پیش رفت سے آگاہ کیا۔
انہوں نے بتایا کہ ملاقات میں یوکرین اور امریکا کے درمیان تعاون کے فروغ پر بھی بات ہوئی، جس میں ڈرون ٹیکنالوجی اور امریکی ہتھیاروں کی خریداری سے متعلق دو طرفہ معاہدے شامل ہیں۔
یوکرینی صدر نے کہا کہ میں کیتھ کیلاگ کی حمایت اور تعاون اور امریکی صدر ڈونلڈ ٹرمپ کی ان کوششوں پر شکر گزار ہوں جو جنگ کے خاتمے اور قتل و غارت روکنے کے لیے کی جا رہی ہیں۔
ملاقات میں یوکرین کے صدارتی دفتر کے سربراہ آندری یرماک اور قومی سلامتی و دفاعی کونسل کے سیکریٹری رستم عمروف بھی شریک تھے۔
خیال رہےکہ زیلنسکی نے گزشتہ ہفتے کہا تھا کہ یوکرینی افواج ڈونیٹسک میں روسی فوج کے خلاف جوابی کارروائی جاری رکھے ہوئے ہیں، جہاں پوکرووسک اور ڈوبروپیلیا کے قریب شدید جھڑپیں ہو رہی ہیں۔
