امریکی صدر ڈونلڈ ٹرمپ سے متعلق ڈاکیومنٹری میں ایڈیٹنگ کے تنازع کے بعد برطانوی نشریاتی ادارے بی بی سی کے ڈائریکٹر جنرل ٹم ڈیوی اور سی ای او ڈیبورا ٹرنز نے اپنے عہدوں سے استعفیٰ دے دیا۔
بی بی سی پر الزام عائد کیا گیا ہے کہ ادارہ اپنی رپورٹنگ میں سیاسی غیرجانبداری برقرار رکھنے میں ناکام رہا۔ متنازعہ ڈاکیومنٹری میں 6 جنوری 2021 کے واقعات سے قبل ٹرمپ کی تقریر کے حصوں کو اس انداز میں جوڑا گیا کہ یوں محسوس ہوا جیسے وہ اپنے حامیوں کو کیپٹل ہل کی جانب مارچ کرنے اور ’’شدید مزاحمت‘‘ کی تلقین کر رہے ہوں۔ یہ ایڈیٹ شدہ پروگرام گزشتہ سال امریکی انتخابات سے صرف ایک ہفتہ قبل نشر کیا گیا تھا۔
برطانوی اخبار دی ٹیلی گراف کے مطابق، بی بی سی کی ایک اندرونی رپورٹ لیک ہونے کے بعد انکشاف ہوا کہ ادارے نے غزہ جنگ کی کوریج کے دوران اسرائیل مخالف تعصب کا مظاہرہ کیا تھا۔ اس کے علاوہ، اسرائیل-حماس جنگ، ٹرانس جینڈر ایشوز، اور ٹرمپ تقریر ایڈیٹنگ تنازع پر بی بی سی انتظامیہ کی جانب سے باضابطہ معذرت کیے جانے کا امکان ہے۔
دوسری جانب، وائٹ ہاؤس نے بی بی سی کو ’’پروپیگنڈا مشین‘‘ قرار دیا ہے، جبکہ ٹرمپ نے ڈائریکٹر جنرل کے استعفے کے بعد دی ٹیلی گراف کا شکریہ ادا کرتے ہوئے کہا کہ ’’بالآخر سچ سامنے آ گیا۔‘‘
