امریکی صدر ڈونلڈ ٹرمپ نے آئندہ ہفتے سعودی ولی عہد سے ہونے والی ملاقات کی تصدیق کرتے ہوئے کہا ہے کہ یہ ملاقات معمولی نہیں بلکہ اہم نوعیت کی ہوگی۔
ائیر فورس ون میں صحافیوں سے گفتگو کرتے ہوئے ٹرمپ نے واضح کیا کہ ملاقات میں دو طرفہ تعلقات اور دفاعی شعبے کے معاملات زیرِ بحث آئیں گے۔
صحافیوں کے سوال پر کہ کیا سعودی عرب کو ایف-35 لڑاکا طیارے فروخت کیے جائیں گے، ٹرمپ نے جواب دیا کہ سعودی عرب بڑی تعداد میں ایف-35 اور دیگر جدید لڑاکا طیارے خریدنے کا خواہش مند ہے۔ انہوں نے کہا کہ امریکا دنیا کے بہترین طیارے اور میزائل بناتا ہے اور یہ فروخت اس معیاری دفاعی تعلقات کا حصہ ہوگی۔
ڈونلڈ ٹرمپ نے ابراہیمی معاہدوں کے حوالے سے کہا کہ یہ معاملہ بھی ملاقات میں زیرِ بحث آئے گا اور امید ہے کہ سعودی عرب جلد اس معاہدے میں شامل ہو جائے گا۔ انہوں نے دونوں ممالک کے تعلقات میں توسیع اور مشرق وسطیٰ میں امن کے قیام کے لیے اس ملاقات کی اہمیت پر زور دیا۔
