وفاقی وزیر اطلاعات عطا اللہ تارڑ نے کہا ہے کہ سیکیورٹی فورسز اور پولیس کی بروقت اور مؤثر کارروائی کے باعث کراچی ایک بڑی تباہی سے محفوظ رہا، جہاں دہشت گردی کے ایک سنگین منصوبے کو عملی جامہ پہنانے سے پہلے ہی ناکام بنا دیا گیا۔
نجی ٹی وی سے گفتگو کرتے ہوئے وفاقی وزیر اطلاعات عطا اللہ تارڑ نے کہا کہ سیکیورٹی اداروں نے فوری کارروائی کرتے ہوئے ایک خاتون کو راستے میں ہی گرفتار کر لیا، جس سے ممکنہ خودکش حملے کا خطرہ ٹل گیا۔
اطلاعات نے کہا کہ کالعدم بلوچ لبریشن آرمی (بی ایل اے) سوشل میڈیا کے ذریعے افراد کی منظم ذہن سازی کرتی ہے اور انہیں دہشت گردی کے لیے استعمال کیا جاتا ہے۔
انہوں نے دعویٰ کیا کہ بی ایل اے، ماہ رنگ بلوچ کی مکمل حمایتی ہے اور اس کا اصل ایجنڈا پاکستان میں عدم استحکام پیدا کرنا ہے۔
عطا تارڑ کا کہنا تھا کہ حکومت نے نیشنل سائبر کرائم ایجنسی کے قیام کو عملی شکل دے دی ہے اور دہشت گردی سے متعلق مواد کے خلاف زیرو ٹالرنس کی پالیسی پر سختی سے عمل کیا جا رہا ہے۔
انہوں نے واضح کیا کہ دہشت گرد عناصر کا خاتمہ نہ صرف زمینی سطح پر کیا جا رہا ہے بلکہ سوشل میڈیا اور ڈیجیٹل پلیٹ فارمز پر بھی ان کے نیٹ ورکس توڑے جائیں گے۔
اس سے قبل وزیر داخلہ سندھ ضیا الحسن لنجار نے انکشاف کیا تھا کہ دہشت گرد تنظیمیں سوشل میڈیا کے ذریعے بلوچ بچیوں کو نشانہ بنا کر انہیں خودکش بمبار بنانے کی کوشش کرتی ہیں۔
انہوں نے والدین کو خبردار کرتے ہوئے کہا تھا کہ وہ اپنے بچوں کے سوشل میڈیا استعمال پر کڑی نظر رکھیں تاکہ انہیں انتہا پسندانہ سوچ سے محفوظ رکھا جا سکے۔
کراچی میں ایڈیشنل آئی جی سی ٹی ڈی آزاد خان اور کراچی پولیس چیف جاوید عالم اوڈھو کے ہمراہ پریس کانفرنس کرتے ہوئے وزیر داخلہ سندھ نے بتایا کہ دہشت گرد عناصر نے سوشل میڈیا کے ذریعے ایک کم عمر بچی سے رابطہ کیا اور مرحلہ وار اس کی ذہن سازی کی گئی۔ ان کے مطابق بچی کو خودکش حملے کے لیے تیار کیا جا رہا تھا، تاہم سیکیورٹی اداروں نے بروقت کارروائی کرتے ہوئے اسے اس خطرناک انجام سے بچا لیا۔
