وزیراعظم شہباز شریف نے کہا ہے کہ 5 جنوری کو اقوام متحدہ کی سلامتی کونسل کی قراردادوں کے ذریعے کشمیری عوام کے حقِ خود ارادیت کو باقاعدہ طور پر تسلیم کیا گیا۔
کشمیر کے یومِ حقِ خود ارادیت کے موقع پر جاری اپنے بیان میں وزیراعظم نے کہا کہ 5 جنوری 1949 کو اقوام متحدہ کے کمیشن برائے بھارت و پاکستان نے ایک تاریخی قرارداد منظور کی تھی۔
ان کا کہنا تھا کہ اس قرارداد کے تحت ریاست جموں و کشمیر کے مستقبل کا فیصلہ آزاد اور غیرجانبدار رائے شماری کے ذریعے ہونا تھا، تاہم بھارت کے غیرقانونی قبضے کے باعث یہ وعدہ آج تک پورا نہیں ہو سکا۔
وزیراعظم شہباز شریف نے کہا کہ مقبوضہ کشمیر کے عوام گزشتہ آٹھ دہائیوں سے بھارتی قابض افواج کے مظالم برداشت کر رہے ہیں، لیکن جبر اور تشدد کے باوجود کشمیری عوام کے حوصلے پست نہیں کیے جا سکے۔
انہوں نے مطالبہ کیا کہ عالمی برادری مقبوضہ کشمیر میں بھارت کے جابرانہ اقدامات کے خاتمے کے لیے عملی کردار ادا کرے۔
واضح رہے کہ آج پاکستان، آزاد کشمیر اور دنیا بھر میں مقیم کشمیری یومِ حقِ خود ارادیت منا رہے ہیں۔
