اسلام آباد: وفاقی دارالحکومت میں گاڑیوں پر ایم ٹیگ لگوانے کی مہلت ختم ہو گئی ہے، شہریوں کی سہولت کو مدنظر رکھتے ہوئے ڈائریکٹر جنرل ایکسائز نے دو ایم ٹیگ سینٹرز کو 24 گھنٹے فعال رکھنے کا فیصلہ کیا ہے۔
ڈی جی ایکسائز کے مطابق 26 نمبر چونگی اور 17 میل (پھگراں) ٹول پلازہ پر ایم ٹیگ کی سہولت چوبیس گھنٹے فراہم کی جائے گی تاکہ شہریوں کو کسی قسم کی دشواری کا سامنا نہ ہو۔
ڈپٹی کمشنر اسلام آباد عرفان میمن نے بتایا کہ کچنار پارک سیکٹر I-8 اور سیکٹر F-9 پارک میں قائم ایم ٹیگ فراہمی کاؤنٹرز رات 12 بجے تک کھلے رہیں گے، یہ فیصلہ شہریوں کو ایم ٹیگ کے حصول میں سہولت فراہم کرنے کے لیے کیا گیا ہے۔
ڈی سی اسلام آباد نے واضح کیا کہ ڈیڈ لائن ختم ہونے کے بعد کل سے بغیر ایم ٹیگ گاڑیوں کے خلاف باقاعدہ کارروائی کا آغاز کیا جائے گا۔ اس سلسلے میں انہوں نے ڈی جی سیف سٹی کے ہمراہ مختلف ناکہ جات کا دورہ بھی کیا، جہاں چیف ٹریفک آفیسر اور ایس ایس پی آپریشنز بھی موجود تھے۔ دورے کے دوران ایم ٹیگ ریڈرز کا عملی جائزہ لیا گیا۔
عرفان میمن کے مطابق ایم ٹیگ ریڈرز کی مدد سے بغیر ایم ٹیگ گاڑیوں کو ناکہ جات پر روکا جائے گا اور ابتدائی طور پر 12 ناکہ جات پر کارروائیاں کی جائیں گی۔ انہوں نے شہریوں سے اپیل کی کہ کسی بھی پریشانی سے بچنے کے لیے فوری طور پر اپنی گاڑیوں پر ایم ٹیگ لگوائیں۔
ڈی سی اسلام آباد نے مزید بتایا کہ شہریوں کی سہولت کے لیے شہر بھر میں 16 مختلف مقامات پر ایم ٹیگ سے متعلق خدمات فراہم کی جا رہی ہیں۔
