کراچی: ممتاز عالم دین مفتی تقی عثمانی نے گل پلازہ میں آگ کے المناک واقعے پر افسوس کا اظہار کرتے ہوئے کہا ہے کہ کراچی جیسے شہر میں آگ پر بروقت قابو نہ پانا ایک شرمناک سوالیہ نشان ہے۔
اپنے بیان میں مفتی تقی عثمانی نے کہا کہ گل پلازہ واقعے میں بروقت مدد کیوں نہیں پہنچ سکی، اس کی بے لاگ اور شفاف تحقیقات ہونی چاہیے۔
انہوں نے کہا کہ چند گھنٹوں میں کتنی جانیں بے چارگی کا شکار ہو کر رخصت ہوگئیں اور کتنے تاجروں کا اربوں روپے کا نقصان ہوا، یہ قوم کے لیے انتہائی المناک اور شرمناک سانحہ ہے۔
مفتی تقی عثمانی نے مزید کہا کہ حفاظتی انتظامات کو مضبوط اور فعال بنانا حکومت کی ذمہ داری ہے، اور جن لوگوں نے انسانی جانیں بچانے میں خدمات انجام دیں وہ قابل ستائش ہیں۔ انہوں نے دعا کی کہ اللّٰہ تعالیٰ شہدا کو اعلیٰ درجات عطا فرمائیں اور آفت زدگان کو نعم البدل دے۔
