لاہور:وفاقی وزیر اطلاعات و نشریات عطا اللہ تارڑ نے کہا ہے کہ فیلڈ مارشل کی قیادت میں بھارت کے خلاف حاصل کی گئی کامیابی نے بھارت کو شدید تکلیف میں مبتلا کر دیا ہے، اسی لیے وہ پراکسیز کے ذریعے پاکستان کو عدم استحکام سے دوچار کرنے کی کوشش کر رہا ہے، تاہم سیکیورٹی ایجنسیاں ان عناصر کا مکمل خاتمہ کرکے ہی دم لیں گی۔
میڈیا سے گفتگو کرتے ہوئے وفاقی وزیر نے کہا کہ کل بلوچستان میں فتنہ الہندوستان کی جانب سے بزدلانہ حملہ کیا گیا، جسے سیکیورٹی فورسز نے بروقت کارروائی کرتے ہوئے ناکام بنا دیا، وہ پاک فوج اور سیکیورٹی اداروں کو خراج تحسین پیش کرتے ہیں جن کی پیشہ ورانہ کارروائی کے باعث اسی سے زائد دہشت گردوں کو جہنم واصل کیا گیا اور بلوچستان ایک بڑے نقصان سے بچ گیا۔
عطا اللہ تارڑ نے بتایا کہ دہشت گرد بارہ مختلف شہروں میں حملوں کی نیت سے داخل ہوئے تھے، سیکیورٹی فورسز نے بھرپور مقابلہ کرتے ہوئے انہیں شکست دی، بھارتی میڈیا پر بیٹھ کر بلوچستان کا ذکر کیا جا رہا ہے، جو اس بات کا ثبوت ہے کہ بھارت براہِ راست ان سازشوں میں ملوث ہے،وزیراعظم شہباز شریف صورتحال سے لمحہ بہ لمحہ آگاہ رہے اور ریاستی اداروں نے مکمل ہم آہنگی کے ساتھ کارروائیاں کیں۔
وفاقی وزیر اطلاعات نے کہا کہ جب بھارت کو ماضی میں منہ کی کھانی پڑی تو وہ دم دبا کر بھاگ گیا اور آج بھی وہ اپنی شکست کا بدلہ پراکسیز کے ذریعے لینے کی کوشش کر رہا ہے، جو کبھی کامیاب نہیں ہو گی۔
کے پی کے حکومت پر تنقید کرتے ہوئے عطا اللہ تارڑ نے کہا کہ خیبرپختونخوا کے ترجمان ٹی وی پروگرامز میں بیٹھ کر زبان درازی کرتے ہیں، انہیں چاہیے کہ پنجاب سے سیکھیں، شہباز شریف کے دورِ وزارتِ اعلیٰ میں پنجاب میں بڑے ترقیاتی منصوبے مکمل ہوئے اور موجودہ وزیراعلیٰ بھی صوبے میں نمایاں کام کر رہے ہیں۔
ان کا کہنا تھا کہ قوم خیبرپختونخوا حکومت کو اربوں روپے دیتی ہے لیکن وہاں اب تک کوئی قابلِ ذکر منصوبہ نظر نہیں آتا۔ انہوں نے سوال اٹھایا کہ تیراہ کے لیے مختص چار ارب روپے کہاں خرچ کیے گئے؟ باڑہ کے سیاسی اتحاد نے بھی بدانتظامی اور بدعنوانی کی نشاندہی کی ہے۔
وفاقی وزیر نے کہا کہ خیبرپختونخوا میں جب فتنہ الخوارج حملہ کرتا ہے تو پاک فوج آگے بڑھ کر عوام کی حفاظت کرتی ہے جبکہ صوبائی حکومت اکثر غائب ہوتی ہے،قدرتی آفات کے دوران بھی پنجاب حکومت خیبرپختونخوا کی مدد کرتی ہے۔
عطا اللہ تارڑ نے مزید کہا کہ خیبرپختونخوا حکومت کا کام صرف احتجاج کرنا اور اڈیالہ جیل کے باہر بیٹھنا رہ گیا ہے، گورنر راج ایک آئینی آپشن ہے اور جب کوئی صوبائی حکومت مکمل طور پر ناکام ہو جائے تو یہ اختیار استعمال کیا جا سکتا ہے۔
بانی پی ٹی آئی کے حوالے سے بات کرتے ہوئے وفاقی وزیر نے کہا کہ انہیں مکمل طبی سہولتیں فراہم کی جا رہی ہیں، رضامندی کے بعد ان کا علاج کیا گیا اور ایک معمولی طبی عمل کے بعد انہیں دوبارہ اڈیالہ جیل منتقل کر دیا گیا۔
انہوں نے واضح کیا کہ ریاست پاکستان دہشت گردی، پراکسی جنگ اور بدامنی کے خلاف زیرو ٹالرنس کی پالیسی پر عمل پیرا ہے اور ملک دشمن عناصر کو ہر صورت انجام تک پہنچایا جائے گا۔
