ریاض : ترک صدر رجب طیب اردوان نے سعودی عرب کے ساتھ مختلف شعبوں میں تعاون کو نئی بلندیوں تک لے جانے کی خواہش کا اظہار کرتے ہوئے کہا ہے کہ ترکیہ قابلِ تجدید توانائی، دفاعی صنعت اور علاقائی استحکام کے لیے قریبی اشتراک چاہتا ہے۔
عرب میڈیا کے مطابق ترک صدر ریاض کے کنگ خالد انٹرنیشنل ایئرپورٹ پہنچے جہاں ریاض ریجن کے ڈپٹی گورنر شہزادہ محمد بن عبدالرحمان نے ان کا استقبال کیا۔ بعد ازاں وہ قصر الیمامہ پہنچے جہاں سعودی ولی عہد شہزادہ محمد بن سلمان نے ان کا پرتپاک خیرمقدم کیا اور ان کے اعزاز میں سرکاری استقبالیہ تقریب منعقد کی گئی۔
ترک اور سعودی قیادت کے درمیان ہونے والی ملاقات میں دوطرفہ تعلقات، تعاون کے نئے مواقع اور مختلف شعبوں میں شراکت داری کو مزید مضبوط بنانے پر تبادلہ خیال کیا گیا۔ دونوں رہنماؤں نے علاقائی اور عالمی صورتحال پر بھی تفصیلی گفتگو کی۔
اس موقع پر ترک صدر نے کہا کہ شام میں استحکام کے لیے ترکیہ اپنی حمایت جاری رکھے گا اور شام کی تعمیر نو کے عمل میں سعودی عرب کے ساتھ مل کر کام کرے گا۔ انہوں نے غزہ کی صورتحال پر گفتگو کرتے ہوئے کہا کہ ترکیہ وہاں تعمیر نو اور انسانی بحران کے خاتمے کے لیے اپنی کوششیں جاری رکھے ہوئے ہے۔
ملاقات کے دوران یمن کی تازہ صورتحال اور مشرقی افریقہ میں ہونے والی پیش رفت بھی زیرِ بحث آئی۔
