اسلام آباد: ازبکستان کے صدر شوکت مرزایوف دو روزہ سرکاری دورے پر اسلام آباد پہنچ گئے، جہاں ان کا پرتپاک استقبال صدر مملکت آصف علی زرداری اور وزیراعظم میاں محمد شہباز شریف نے کیا۔
نجی ٹی وی کی رپورٹ کے مطابق نور خان ایئر بیس پر منعقدہ استقبال کے موقع پر ثقافتی لباس میں ملبوس بچوں نے ازبکستان کے صدر شوکت مرزایوف کو گلدستے پیش کیے جبکہ وفاقی وزیر اطلاعات و نشریات عطاء اللہ تارڑ، وزیرِ اعظم کے معاونِ خصوصی ہارون اختر خان، اعلیٰ سول و عسکری حکام اور سفارتی عملے کے ارکان بھی موجود تھے۔
رپورٹ کے مطابق دورے کے دوران ازبک صدر اور وزیرِ اعظم شہباز شریف کے درمیان دوطرفہ تعلقات کے فروغ، تجارتی سرمایہ کاری، توانائی، ٹرانسپورٹ اور دیگر باہمی تعاون کے شعبوں پر تفصیلی تبادلہ خیال متوقع ہے۔
میڈیا رپورٹس کے مطابق دونوں ممالک کے درمیان کئی مفاہمتی یادداشتوں اور معاہدوں پر دستخط کیے جانے کا امکان ہے، جو خطے میں اقتصادی و تجارتی روابط کو مزید مستحکم کرنے کا پیش خیمہ ہوں گے۔
صدرِ مملکت آصف علی زرداری سے ہونے والی علیحدہ ملاقات میں خطے کی موجودہ سیاسی صورتحال، سکیورٹی اور باہمی دلچسپی کے دیگر امور زیرِ غور آئیں گے۔
پاکستانی حکام کا کہنا ہے کہ اس دورے کے دوران دونوں ممالک کے تعلقات کو نئی جہت دینے اور سرمایہ کاری کے مواقع بڑھانے پر زور دیا جائے گا، جبکہ ثقافتی اور تعلیمی شعبوں میں بھی تعاون کے نئے منصوبے متعارف کرائے جائیں گے۔
ماہرین کے مطابق ازبکستان اور پاکستان کے درمیان تجارتی اور علاقائی تعلقات میں موجودہ پیش رفت، وسطی ایشیا اور جنوبی ایشیا کے درمیان اقتصادی روابط مضبوط کرنے کے لیے اہم سنگِ میل ثابت ہوگی، جبکہ اس دورے سے دونوں ممالک کے درمیان سیاسی اعتماد اور باہمی تعاون میں بھی اضافہ متوقع ہے۔
