بخبر رساں اداروں کے مطابق یہ فیصلہ ایسے وقت میں کیا گیا ہے جب دونوں ممالک کے درمیان سیکورٹی تعاون اور انٹیلی جنس شیئرنگ کے معاملات میں حالیہ مہینوں کے دوران نمایاں پیش رفت ہوئی ہے۔
اس حوالے سے کینیا کے صدر ولیم روٹو نے کہا ہے کہ اپریل سے سرحدی گزرگاہوں کے ذریعے باقاعدہ تجارتی اور سفری سرگرمیوں کا آغاز ہو جائے گا، جس سے مقامی معیشت کو سہارا ملے گا۔
یاد رہے کہ 2011 میں شدت پسند تنظیم الشباب کی کارروائیوں کے بعد سرحد بند کر دی گئی تھی۔ 2013 میں نیروبی کے ویسٹ گیٹ شاپنگ مال اور 2015 میں گاریسا یونیورسٹی پر حملوں نے سیکورٹی خدشات کو مزید گہرا کر دیا تھا، جس کے نتیجے میں سرحدی نگرانی سخت کر دی گئی تھی۔
اب حکام کا کہنا ہے کہ بہتر سرحدی انتظام، جدید نگرانی کے آلات اور رجسٹریشن نظام کے ذریعے خطرات کو کم کیا جائے گا۔
ماہرین کے مطابق اس فیصلے سے مویشیوں، زرعی اجناس اور دیگر اشیا کی قانونی تجارت کو فروغ ملے گا، جو تاریخی طور پر دونوں ممالک کے درمیان اہم رہی ہے۔
تاہم ناقدین خبردار کر رہے ہیں کہ سیکورٹی کے تقاضوں کو نظرانداز نہیں کیا جا سکتا۔ حکومتی حلقوں کا اصرار ہے کہ نئی حکمت عملی کے تحت سرحد کھولنے کا اقدام علاقائی استحکام اور اقتصادی بحالی کے لیے سودمند ثابت ہوگا۔
