کوئٹہ: بلوچستان کے ضلع بارکھان میں محکمہ انسداد دہشت گردی نے خفیہ معلومات کی بنیاد پر ایک اہم کارروائی کرتے ہوئے 6 دہشت گردوں کو ہلاک کر دیا۔
ترجمان کے مطابق آپریشن کے دوران فائرنگ کا شدید تبادلہ ہوا، تاہم سیکورٹی اہلکار محفوظ رہے اور انہیں کوئی جانی نقصان نہیں پہنچا۔
حکام نے بتایا کہ قابل اعتماد انٹیلی جنس اطلاعات ملنے پر ایک مخصوص مقام پر کارروائی کی گئی، جہاں موجود مسلح افراد نے فورسز کو دیکھتے ہی فائرنگ شروع کر دی۔ جوابی کارروائی میں 6 دہشت گرد مارے گئے۔
حکام کے مطابق ہلاک ہونے والے عناصر تخریبی سرگرمیوں کی منصوبہ بندی میں ملوث تھے اور حساس تنصیبات کو نشانہ بنانے کا ارادہ رکھتے تھے۔
آپریشن کے بعد جائے وقوع سے بھاری مقدار میں اسلحہ، گولہ بارود اور دیگر تخریبی سامان برآمد کیا گیا، جسے تحویل میں لے کر مزید تفتیش شروع کر دی گئی ہے۔
ترجمان کے مطابق یہ کارروائی صوبے میں دہشت گردی کے نیٹ ورک کو کمزور کرنے کی حکمت عملی کا حصہ ہے۔ حکام نے واضح کیا ہے کہ بلوچستان میں قیامِ امن تک ایسے انٹیلی جنس بیسڈ آپریشنز کا سلسلہ جاری رہے گا۔
