آئی ایم ایف کی منیجنگ ڈائریکٹر کرسٹالینا جارجیوا نے کہا ہے کہ پاکستان کا معاشی استحکام سرمایہ کاروں کے لیے خوش آئند ہے۔
وفاقی وزیر خزانہ سینیٹر محمد اورنگزیب اور آئی ایم ایف کی منیجنگ ڈائریکٹر کرسٹالینا جارجیوا کے درمیان اہم ملاقات میں پاکستان کی معاشی صورتحال پر تبادلہ خیال کیا گیا ہے۔
واشنگٹن ڈی سی میں ہونے والی اس اہم ملاقات میں معاشی استحکام کے لیے اٹھائے گئے اقدامات پر گہری اطمینان کا اظہار کیا گیا ہے۔
کرسٹالینا جارجیوا نے کہا کہ پاکستان نے اپنے اصلاحاتی پروگرام پر جس طرح مؤثر طریقے سے عملدرآمد کیا ہے وہ قابل تحسین ہے۔ ان کا مزید کہنا تھا کہ ان اقدامات کے نتیجے میں نہ صرف ملکی معاشی استحکام بحال ہوا ہے بلکہ سرمایہ کاروں کا اعتماد بھی بڑھا ہے۔
وزیر خزانہ محمد اورنگزیب نے آئی ایم ایف کو ملکی معیشت کی موجودہ صورتحال اور اصلاحات کے حوالے سے درپیش چیلنجز سے آگاہ کیا۔ انہوں نے کہا کہ حکومت معاشی نظم و ضبط قائم رکھنے اور ٹیکس نیٹ کو وسیع کرنے کے لیے پرعزم ہے تاکہ پائیدار ترقی کی راہ ہموار ہو سکے۔
آئی ایم ایف کی سربراہ نے واضح کیا کہ مضبوط معاشی پالیسیوں اور گہری ساختی اصلاحات کا تسلسل پاکستان کی طویل مدتی ترقی کے لیے ناگزیر ہے۔ انہوں نے زور دیا کہ ان اقدامات سے عوامی فلاح و بہبود کے منصوبوں کو بہتر بنانے اور معاشی ترقی کی رفتار کو برقرار رکھنے میں بہت مدد ملے گی۔
یہ ملاقات عالمی بینک اور آئی ایم ایف کے سالانہ بہار اجلاس کے موقع پر ہوئی جس میں پاکستان کی جانب سے کی گئی کوششوں کو سراہا گیا۔
اقتصادی ماہرین کا ماننا ہے کہ عالمی مالیاتی اداروں کی جانب سے اس طرح کے مثبت ریمارکس پاکستان کی عالمی ساکھ کو بہتر بنانے میں کلیدی کردار ادا کریں گے۔
وزارت خزانہ کے مطابق حکومت اپنی ذمہ دارانہ معاشی پالیسیوں کے ذریعے ملک کو بحرانوں سے نکالنے کا عزم رکھتی ہے۔
