ملک بھر میں گرمی کی شدت میں اضافے کے ساتھ ہی بجلی کی غیر اعلانیہ لوڈشیڈنگ میں بھی نمایاں اضافہ ہوگیا ہے، جس کے باعث شہریوں کو شدید مشکلات کا سامنا ہے۔
ذرائع کے مطابق ملک میں بجلی کا شارٹ فال 4 ہزار میگاواٹ تک پہنچ چکا ہے، جس کے نتیجے میں مختلف شہروں میں طویل دورانیے کی لوڈشیڈنگ جاری ہے۔ کراچی کے متعدد علاقوں میں روزانہ 10،10 گھنٹے بجلی کی بندش معمول بن چکی ہے، جبکہ راولپنڈی میں بھی 8 سے 10 گھنٹے لوڈشیڈنگ نے شہریوں کو پریشان کر رکھا ہے۔
وفاقی دارالحکومت اسلام آباد میں 6 گھنٹے تک بجلی غائب رہتی ہے جبکہ لاہور کے مختلف علاقوں میں 5 سے 6 گھنٹے لوڈشیڈنگ ہو رہی ہے۔ پشاور کے شہری علاقوں میں 6 گھنٹے اور نواحی علاقوں میں 14 گھنٹے تک بجلی کی بندش رپورٹ ہوئی ہے۔
وزارت توانائی نے صورتحال کے پیش نظر صنعتوں کو بھی لوڈشیڈنگ میں شامل کر لیا ہے اور بند پاور پلانٹس کو دوبارہ فعال کرنے پر غور جاری ہے۔ اس حوالے سے وفاقی وزیر توانائی Awais Leghari نے اعلان کیا ہے کہ آج سے لوڈشیڈنگ میں کمی لانے کی کوشش کی جائے گی۔
